ആലപ്പുഴ : മാന്നാറിൽ ഒന്നര വയസുള്ള മകനെ മർദ്ദിച്ച സംഭവത്തിൽ അറസ്റ്റിലായ അമ്മ കുട്ടിയുടെ പിതാവിനെതിരെ പരാതി നൽകി.മാന്നാർ കുട്ടംപേരൂർ എളവ അക്ബർ മൻസിലിൽ അനീഷ (32) ആണ് കുട്ടിയുടെ പിതാവ് തിരുവനന്തപുരം പാങ്ങോട് മറിയം ഹൗസിൽ നജുമുദീനെതിരെ മാന്നാർ പോലീസിൽ പരാതി നൽകിയത് .വിവാഹ വാഗ്ദാനം നൽകി പീഡിപ്പിച്ചെന്നും കുട്ടിയെ നോക്കാനുള്ള ചെലവ് തരുന്നില്ലെന്നുമാണ് പരാതി.
രണ്ടുവട്ടം വിവാഹ മോചിതയായ അനീഷ സമൂഹമാധ്യമം വഴി പരിചയത്തിലായ നജുമുദീനൊപ്പം 2022 മുതൽ ഒരുമിച്ച് ജീവിച്ച് വരികയായിരുന്നു.ഇയാൾക്ക് മറ്റ് രണ്ട് ഭാര്യമാരുള്ള വിവരം പിന്നീടാണ് ഇവർ അറിഞ്ഞത്. അനീഷ ഗർഭിണിയായിരുന്ന സമയത്തു നജുമുദീൻ മറ്റൊരു സ്ത്രീയെകൂടി വിവാഹം ചെയ്തു. നജുമുദീനോടുള്ള ദേഷ്യമാണ് കുഞ്ഞിനെ മർദ്ദിക്കാൻ കാരണമായതെന്ന് പൊലീസ് പറഞ്ഞു.കുട്ടിയെ ഉപദ്രവിച്ച കേസിൽ അനീഷയെ ജാമ്യത്തിൽ വിട്ടയച്ചു.
