തിരുവനന്തപുരം : കേരളത്തിലെ ഏറ്റവും പ്രായം കുറഞ്ഞ അവയവദാതാവ്, പത്തനംതിട്ടയിലുണ്ടായ വാഹനാപകടത്തില് മസ്തിഷ്ക മരണം സംഭവിച്ച ആലിന് ഷെറിന്റെ സംസ്കാരം ഔദ്യോഗിക ബഹുമതികളോടെയെന്ന് മുഖ്യമന്ത്രി പിണറായി വിജയൻ അറിയിച്ചു.
നെടുങ്ങാടപ്പള്ളി സെന്റ് തോമസ് പള്ളിയില് ഞായറാഴ്ച വൈകീട്ട് 3.30 നാണ് സംസ്കാരം നിശ്ചയിച്ചിരിക്കുന്നത്. രാത്രിയില് സിവില് ഏവിയേഷന് ഹെലികോപ്റ്റര് ഉപയോഗിക്കാന് അനുവാദമില്ലാത്തതിനാലാണ് റോഡ് മാര്ഗം അവയവങ്ങള് കൊണ്ട് വരാന് തിരുമാനിച്ചതെന്നും മുഖ്യമന്ത്രി പറഞ്ഞു.
ഹെലികോപ്റ്റര് മുഖേന അവയവങ്ങള് കൊച്ചിയില് നിന്നും തിരുവനന്തപുരത്ത് എത്തിക്കാനാണ് ആദ്യം ആലോചിച്ചിരുന്നത്. ആലിനില് നിന്നും സ്വീകരിച്ച അവയവങ്ങള് നിലവില് 2 കുഞ്ഞുങ്ങള്ക്ക് നല്കാന് സാധിച്ചു. അവരുടെ ആരോഗ്യനില മെച്ചപ്പെട്ടു വരുന്നു എന്ന വിവരമാണ് ആശുപത്രി അധികൃതരില് നിന്നും അറിയാന് കഴിഞ്ഞതെന്നും അദ്ദേഹം അറിയിച്ചു.
പത്തുമാസം പ്രായമുള്ള ആലിന് ഷെറിന് എബ്രഹാം എന്ന കുരുന്നിന്റെ വിയോഗം ഏറെ വേദനയുളവാക്കുന്നതാണ്. എത്രയും പ്രിയപ്പെട്ട കുഞ്ഞ് വേര്പിരിഞ്ഞതിന്റെ തീരാനോവിനിടയിലും അവളുടെ അവയവങ്ങള് ദാനം ചെയ്യാനായി മുന്നോട്ടുവന്ന ആലിന്റെ മാതാപിതാക്കളുടെ തീരുമാനം മഹത്തരമാണെന്നും മുഖ്യമന്ത്രി വ്യക്തമാക്കി.
ഫെബ്രുവരി 5 -ന് ഉച്ചയ്ക്ക് 2.30 -ന് റോഡപകടത്തെ തുടര്ന്നാണ് പത്തനംതിട്ട മല്ലപ്പള്ളി സ്വദേശികളുടെ 10 മാസം പ്രായമുള്ള മകള്ക്ക് മസ്തിഷ്ക മരണം സംഭവിച്ചത്. കോട്ടയത്ത് നിന്നും തിരുവല്ലയിലേക്ക് എം.സി. റോഡ് വഴി കാറില് യാത്ര ചെയ്യുന്നതിനിടെ, പള്ളം ബോര്മ കവല ജംഗ്ഷന് സമീപം എതിര്ദിശയില് നിന്നുവന്ന കാര് വാഹനത്തിലേക്ക് ഇടിച്ചുകയറി അപകടം സംഭവിക്കുകയായിരുന്നു.
കുട്ടിയ്ക്ക് ഗുരുതമായി പരിക്കേല്ക്കുകയും കൂടെയുണ്ടായിരുന്ന കുട്ടിയുടെ അമ്മയ്ക്കും മാതാവിന്റെ മാതാപിതാക്കള്ക്കും സാരമായ പരിക്കുകള് സംഭവിക്കുകയും ചെയ്തു. അപകടം നടന്ന ഉടന് തന്നെ കുഞ്ഞിനെ വിവിധ ആശുപത്രിയിൽ 2 ചികിത്സിക്കുകയും പിന്നീട് ഫെബ്രുവരി 7-ന് കൊച്ചിയിലെ അമൃത ആശുപത്രിയിലേക്കും പ്രവേശിപ്പിച്ചു. 13 -ന് കുട്ടിയ്ക്ക് മസ്തിഷ്ക മരണം സംഭവിക്കുകയും കുട്ടിയുടെ കുടുംബാംഗങ്ങള് അവയവദാനത്തിന് സമ്മതം നല്കുകയും ചെയ്യുകയായിരുന്നു.
