തിരുവല്ല: തിരുവല്ല പോലീസ് സ്റ്റേഷനിലെ എഎസ്ഐ ബിനുവിനെ ജില്ലാ പോലീസ് ആസ്ഥാനത്തേക്ക് മാറ്റി. പോലീസ് സേനയുടെ ഔദ്യോഗിക രഹസ്യങ്ങള് ചോര്ത്തി നല്കി, കാപ്പ കേസ് പ്രതിയെ വഴി വിട്ടു സഹായിച്ചു എന്നിങ്ങനെയുള്ള ആരോപണത്തെ തുടര്ന്നാണ് നടപടി ഉണ്ടായത്.
തിരുവനന്തപുരം റൂറലില് നിന്ന് രണ്ടു വര്ഷം മുന്പാണ് ബിനുവിനെ തിരുവല്ലയിലേക്ക് മാറ്റിയത്. ഇവിടെ ഇയാള് വ്യക്തിബന്ധങ്ങള് ഏറെയുണ്ടാക്കിയെന്നാണ് വിവരം. സ്പെഷല് ബ്രാഞ്ച് റിപ്പോര്ട്ടിന്റെ അടിസ്ഥാനത്തില് എസ്പി ആര്. ആനന്ദാണ് ബിനുവിനെ എ.ആര്. ക്യാമ്പിലേക്ക് മാറ്റിയത്.
കഴിഞ്ഞ ദിവസം അറസ്റ്റിലായ കാപ്പ കേസ് പ്രതിയ്ക്ക് വേണ്ടി പോലീസില് നിന്നുളള രേഖകള് ചോര്ത്തി നല്കിയെന്നതാണ് ഒടുവിലായി വന്നിരിക്കുന്ന വീഴ്ച. പായിപ്പാട് സ്വദേശിയുമായി ഇയാള് അടുത്ത ബന്ധം പുലര്ത്തുകയും ഇയാള് മുഖേനെ പോലീസിനെ നിര്ണായക രേഖകള് ചോര്ത്തുകയും ചെയ്തുവെന്നും പറയുന്നു. സംഭവത്തിൽ അന്വേഷണം ആരംഭിച്ചു.
