അമ്പലപ്പുഴ : ബ്യൂട്ടി പാർലറിൽ എസി പൊട്ടിത്തെറിച്ച് തീപിടുത്തം. ലക്ഷങ്ങളുടെ നഷ്ടം. ആർക്കും പരിക്കില്ല. അമ്പലപ്പുഴ കച്ചേരി മുക്കിന് കിഴക്ക് ഭാഗത്തായി പ്രവർത്തിക്കുന്ന ബ്യൂട്ടി ആർട്സ് എന്ന സ്ഥാപനത്തിലാണ് തീപിടുത്തമുണ്ടായത്. ഇന്ന് രാവിലെ പത്തരയോടെ സ്ഥാപനമുടമ കഞ്ഞിപ്പാടം മുപ്പത്തിയഞ്ചിൽ ആശ സ്ഥാപനം തുറന്ന് എ.സി ഓണാക്കിയപ്പോൾ പൊട്ടിത്തെറിച്ച് തീ പടരുകയായിരുന്നു. തൊട്ടടുത്ത മറ്റൊരു ഗോഡൗണിലേക്കും തീ പടർന്നു.
തുടർന്ന് തകഴിയിൽ നിന്നെത്തിയ രണ്ട് യുണിറ്റ് ഫയർഫോഴ്സുദ്യോഗസ്ഥർ അര മണിക്കൂറിലധികം പണിപ്പെട്ടാണ് തീയണച്ചത്. കെട്ടിടത്തിൻ്റെ മുകൾ ഭാഗത്തായിരുന്നു തീ പിടുത്തമുണ്ടായത്.ബ്യൂട്ടി പാർലറും തൊട്ടടുത്ത കടമുറിയിലെ സാധനങ്ങളും പൂർണമായി കത്തിയമർന്നു. ഏകദേശം 3 ലക്ഷം രൂപയുടെ നഷ്ടം കണക്കാക്കുന്നതായി ഉടമ പറഞ്ഞു.
