ആലപ്പുഴ: എഞ്ചിൻ തകരാറായി കടലിൽ കുടുങ്ങിയ മത്സ്യബന്ധന വള്ളവും മൂന്ന് തൊഴിലാളികളെയും രക്ഷപ്പെടുത്തി. തിങ്കളാഴ്ച്ച രാവിലെ ആറ് മണിക്കാണ് അഴീക്കൽ തുറമുഖത്ത് നിന്ന് എട്ട് നോട്ടിക്കൽ മൈൽ അകലെ കൊല്ലം നീണ്ടകര സ്വദേശി അരോണി. എ എന്നയാളുടെ ഉടമസ്ഥതയിലുള്ള ജീസസ് എന്ന വള്ളം എഞ്ചിൻ തകരാർ മൂലം കുടുങ്ങി കിടക്കുന്നതായി വിവരം ലഭിച്ചത്.
തുടർന്ന് തോട്ടപ്പള്ളി ഫിഷറീസ് അസിസ്റ്റന്റ് ഡയറക്ടറുടെ നിർദ്ദേശപ്രകാരം ഫിഷറീസ് വകുപ്പിന്റെ റെസ്ക്യൂ സംഘം ഉടൻ സ്ഥലത്തേക്ക് പുറപ്പെട്ടു. വള്ളവും അതിലുണ്ടായിരുന്ന മൂന്ന് തൊഴിലാളികളെയും റെസ്ക്യൂ സംഘം സുരക്ഷിതമായി തുറമുഖത്ത് എത്തിച്ചു. മറൈൻ എൻഫോഴ്സ്മെൻറ് വിഭാഗം സി പി ഒ അരുൺ ബി, ലൈഫ് ഗാർഡുമാരായ ജോർജ്, ജയൻ, സ്രാങ്ക് സുരേഷ് എന്നിവർ രക്ഷാപ്രവർത്തനത്തിൽ പങ്കെടുത്തു.
