പത്തനംതിട്ട : മല്ലശേരിക്ക് സമീപം പൂങ്കാവ് ജംഗ്ഷനിൽ ബേക്കറി കടയിൽ വൻ തീപിടുത്തം. ഇന്ന് രാവിലെ 7 ന് ആയിരുന്നു സംഭവം. മലബാർ ബേക്കറിയിലാണ് തീപിടുത്തം ഉണ്ടായത്. ഫ്രീസർ, അലമാര, ഇലക്ട്രിക് ഉപകരണങ്ങൾ, ബേക്കറി സാധനങ്ങൾ എന്നിവ കത്തി നശിച്ചു.5 ലക്ഷം രൂപയുടെ നഷ്‌ടം ഉണ്ടായതായാണ് പ്രാഥമിക വിവരം.
തലശ്ശേരി സ്വദേശി പ്രതീക്ഷിൻ്റെ ഉടമസ്ഥതയിലുള്ളതാണ് സ്ഥാപനം. പത്തനംതിട്ടയിൽ നിന്ന് ഫയർ ഫോഴ്സ് എത്തിയാണ് തീ നിയന്ത്രണ വിധേയമാക്കിയത്. പഴയ കെട്ടിടത്തിൽ പ്രവർത്തിച്ചിരുന്ന ബേക്കറിയിൽ ഷോർട്ട് സർക്യൂട്ട് കാരണമാവാം തീ പിടുത്തം ഉണ്ടായതെന്നാണ് പ്രാഥമിക നിഗമനം. കൃത്യ സമയത്ത് ഫയർ ഫോഴ്സും നാട്ടുകാരും എത്തി തീ പടരുന്നത് നിയന്ത്രിച്ചതിനാൽ മറ്റു കെട്ടിടങ്ങളിലേക്ക് പടരുന്നതു ഒഴിവായി.
