കോന്നി : പൊലീസ് ജീപ്പിൻ്റെ മുകളിൽ വച്ച് പരാതി എഴുതിയെന്ന് ആരോപിച്ച് സിപിഎം ഏരിയാ കമ്മിറ്റി അംഗത്തെ മർദിച്ച പൊലീസ് ഡ്രൈവറെ സർവീസിൽ നിന്ന് സസ്പെൻഡ് ചെയ്തു.
കോന്നി പൊലീസ് സ്റ്റേഷനിലെ ഡ്രൈവർ രഘുകുമാറിനെ ആണ് അന്വേഷണ വിധേയമായി സസ്പെൻഡ് ചെയ്തത്. സിപിഎം ഏരിയാ കമ്മിറ്റി അംഗം ടി. രാജേഷ് കുമാറിനാണ് മർദനമേറ്റത്. പൊലീസ് ഡ്രൈവർ മദ്യ ലഹരിയിലായിരുന്നു വെന്നും അന്വേഷണത്തിൽ കണ്ടെത്തി.
കോന്നി സ്റ്റേഷനിൽ രാജേഷ് കുമാറിനൊപ്പം എത്തിയ പരാതിക്കാരൻ പൊലിസ് ജീപ്പിന് മുകളിൽ വച്ച് പരാതി എഴുതിയതാണ് രഘുകുമാറിനെ പ്രകോപിതനാക്കിയത്.തുടർന്ന് നടന്ന വാക്കുതർക്കത്തിനിടെയാണ് രാജേഷ് കുമാറിന് മർദനമേറ്റത്. കോന്നി താലൂക്ക് ആശുപത്രിയിൽ ചികിത്സ തേടിയ രാജേഷ് കുമാർ ഡ്രൈവർക്കെതിരെ പരാതി നൽകുകയായിരുന്നു.
