തിരുവനന്തപുരം : സംസ്ഥാനത്തെ14,000 റേഷന്‍ കടകളിൽ സിസിടിവി ക്യാമറകള്‍ സ്ഥാപിക്കാനുള്ള പദ്ധതിയുമായി ഭക്ഷ്യ-പൊതുവിതരണ വകുപ്പ്. റേഷന്‍ സാധനങ്ങള്‍ അനധികൃതമായി കൈമാറുന്നതും മറിച്ചുവില്‍ക്കുന്നതും ഉള്‍പ്പെടെയുള്ള ക്രമക്കേടുകള്‍ കണ്ടെത്തുകയാണ് ലക്ഷ്യം.
റേഷന്‍ കടകളിലെ പ്രവര്‍ത്തനങ്ങള്‍ നിരീക്ഷണത്തിലാക്കുന്നതിലൂടെ ഭക്ഷ്യധാന്യങ്ങളുടെ വിതരണത്തില്‍ കൂടുതല്‍ സുതാര്യത ഉറപ്പാക്കാനാകുമെന്നാണ് വകുപ്പിന്റെ കണക്കുകൂട്ടല്‍. കടകളില്‍ നടക്കുന്ന ഇടപാടുകളും സാധനങ്ങളുടെ കൈമാറ്റവും ക്യാമറ നിരീക്ഷണത്തിലാക്കുന്നതോടെ ക്രമക്കേടുകള്‍ കണ്ടെത്താനും നടപടി സ്വീകരിക്കാനും സാധിക്കും.
ഇതിന് പുറമെ സംഭരിച്ച നെല്ല് മില്ലുകളിലേക്ക് കൊണ്ടുപോകുന്ന വാഹനങ്ങളിലും നിരീക്ഷണം ഏര്‍പ്പെടുത്തും. ഇതിനായി വാഹനങ്ങളില്‍ ജിപിഎസ് സംവിധാനം സ്ഥാപിക്കാനാണ് നീക്കം. നെല്ലിന്റെ നീക്കം കൃത്യമായി നിരീക്ഷിക്കുന്നതിലൂടെ വഴിമധ്യേയുള്ള ക്രമക്കേടുകള്‍ തടയുകയാണ് ലക്ഷ്യം.
അടുത്ത വര്‍ഷത്തെ ബജറ്റിലേക്ക് സമര്‍പ്പിക്കുന്ന ഭക്ഷ്യ-പൊതുവിതരണ വകുപ്പിന്റെ നിര്‍ദേശങ്ങളില്‍ സിസിടിവി, ജിപിഎസ് പദ്ധതികളും ഉള്‍പ്പെടുത്തും. പദ്ധതികള്‍ നടപ്പിലായാല്‍ റേഷന്‍ കടകളും നെല്ല് സംഭരണവും മില്ലുകളിലേക്കുള്ള നീക്കവും നിരീക്ഷണത്തിലാകും
