പത്തനംതിട്ട : മൂഴിയാര് ഡാമിന്റെ വൃഷ്ടിപ്രദേശത്ത് മഴയെത്തുടര്ന്ന് സംഭരണിയിലെ ജലനിരപ്പ് ഉയരുന്നതിനാല് ഡാമിന്റെ മൂന്നു ഷട്ടറുകളില് രണ്ടാമത്തെ ഷട്ടര് 10 സെന്റീമീറ്റര് ഉയര്ത്തി ജലം പുറത്തേക്ക് ഒഴുക്കി തുടങ്ങി. വ്യാഴാഴ്ച്ച വൈകിട്ട് നാലിനാണ് ഡാമിന്റെ ഷട്ടര് ഉയര്ത്തി ജലം കക്കാട്ടാറിലേക്ക് ഒഴുക്കി വിട്ടുതുടങ്ങിയത്.
ഇതുമൂലം ആങ്ങമൂഴി, സീതത്തോട് തുടങ്ങിയ സ്ഥലങ്ങളില് നദിയിലെ ജലനിരപ്പ് ഉയരാന് സാധ്യതയുള്ളതിനാല് കക്കാട്ടാറിന്റെയും, മൂഴിയാര് ഡാം മുതല് കക്കാട് പവര്ഹൗസ് വരെയുള്ള ഇരുകരകളില് താമസിക്കുന്നവരും പൊതുജനങ്ങളും ജാഗ്രത പുലര്ത്തണമെന്നും നദിയില് ഇറങ്ങുന്നത് ഏതു സാഹചര്യത്തിലും ഒഴിവാക്കണമെന്നും ജില്ലാ കലക്ടര് എസ് പ്രേംകൃഷ്ണന് അറിയിച്ചു.
