തിരുവല്ല : രണ്ടാമത് അപ്പർ കുട്ടനാട് ജലോത്സവം സെപ്റ്റംബർ 13 ന് ഉച്ചയ്ക്ക് 2 ന് കടപ്ര ബേദ്ലഹേം സെന്റ് ജോർജ്ജ് ഓർത്തഡോക്സ് പള്ളിക്കടവ് മുതൽ സെന്റ് തോമസ് ഹൈസ്കൂൾ കടവ് വരെയുള്ള അപ്പർ കുട്ടനാടൻ നെട്ടായത്തിൽ നടക്കും. ജലോത്സവത്തിൽ 20 ൽ പരം വള്ളങ്ങൾ പങ്കെടുക്കും.
കേരള നിയമസഭ ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്യും. മുൻ റാന്നി എം.എൽ.എ രാജു ഏബ്രഹാം മുഖ്യാതിഥിയാകും. ആൻ്റോ ആൻറണി എംപി സമ്മാനദാനം നിർവ്വഹിക്കും.
മേല്പാടം, കടവിൽ, പായിപ്പാട് പുത്തൻചുണ്ടൻ എന്നിവ കന്നിയങ്കത്തിൽ മാറ്റുരയ്ക്കുന്ന ഈ വർഷത്തെ ജലോത്സവം ചരിത്രത്തിൻ്റെ നാഴികക്കല്ലാകും. ആനാരി, ആയാപറമ്പ് പാണ്ടി, ആയാപറമ്പ് വലിയ ദിവാൻജി , സെൻ്റ് ജോർജ്ജ്, വീയപുരം, നിരണം, ചെറുതന എന്നീ വള്ളങ്ങളിൽ കേരളത്തിലെ പ്രമുഖ ടീമുകളായ വി.ബി സി. കൈനകരി , കുമരകം ടൗൺ ബോട്ട് ക്ലബ്ബ്, നിരണം ബോട്ട് ക്ലബ്ബ്, പള്ളാത്തുരുത്തി ബോട്ട് ക്ലബ്ബ്, യു. ബി.സി. കൈനകരി , പുന്നമട ബോട്ട് ക്ലബ്ബ്, ആലപ്പുഴ ടൗൺ ബോട്ട് ക്ലബ്ബ്, കൊല്ലം ജീസസ് ബോട്ട് ക്ലബ്ബ്, ചെറുതന ബോട്ട് ക്ലബ്ബ്, നിരണം വില്ലേജ് ബോട്ട് ക്ലബ്ബ് അതികായന്മാർ മത്സരിക്കും.
നവജ്യോതി, പുളിക്കത്ര ഷോട്ട് , പഴശിരാജ, ,കോട്ടപ്പറമ്പൻ, ആശപുളിക്കക്കളം എന്നീ വെപ്പുവള്ളങ്ങളും ജലറാണി, സെൻ്റ് ജോസഫ് തുടങ്ങിയ ഇരുട്ടുകുത്തി വള്ളങ്ങളും മത്സരിക്കും.
വീയപുരം, നിരണം, കടപ്ര പഞ്ചായത്തുകളിലെ ജലോത്സവ പ്രേമികളുടെ സംയുക്ത സംരംഭമായ അപ്പർ കുട്ടനാട് ബോട്ട് ക്ലബ്ബ് ആണ് ജലോത്സവം സംഘടിപ്പിക്കുന്നത്.
