പത്തനംതിട്ട: സെൻറ് പീറ്റേഴ്സ് ജംഗ്ഷന് സമീപം ഹൈക്കോടതി ഉത്തരവ് മറികടന്ന് ‘ലാഭം മേള’ പ്രവർത്തിക്കുന്നതിനെതിരെ ശക്തമായ പ്രതിഷേധവുമായി കേരള വ്യാപാരി വ്യവസായ ഏകോപന സമിതി. സംഭവം സംബന്ധിച്ച് നഗരസഭ സെക്രട്ടറിയെ വ്യാപാരികൾ ഉപരോധിക്കുകയും നഗരത്തിൽ പ്രതിഷേധ സംഗമം സംഘടിപ്പിക്കുകയും ചെയ്തു.
ലാഭം മേളയുടെ പ്രവർത്തനത്തിന് നഗരസഭാ അധികൃതർ ഹൈക്കോടതി ഉത്തരവ് മറികടന്ന് അനുകൂല നിലപാട് സ്വീകരിക്കുന്നു എന്ന് ആരോപിച്ചാണ് ഉപരോധ സമരം നടന്നത്. കോടതി ഉത്തരവുകൾ കാറ്റിൽപ്പറത്തി അനധികൃതമായി മേളയ്ക്ക് അനുമതി നൽകുന്ന നഗരസഭയുടെ നീക്കം പ്രാദേശിക വ്യാപാരികളുടെ ഉപജീവനമാർഗ്ഗത്തെ പ്രതികൂലമായി ബാധിക്കുന്നുവെന്ന് ഭാരവാഹികൾ വ്യക്തമാക്കി.
വ്യാപാരി വ്യവസായ ഏകോപന സമിതിയുടെ പ്രമുഖ നേതാക്കൾ പ്രതിഷേധത്തിന് നേതൃത്വം നൽകി. വരും ദിവസങ്ങളിലും ഹൈക്കോടതി ഉത്തരവ് നടപ്പിലാക്കുന്നതിൽ നഗരസഭ വീഴ്ച വരുത്തിയാൽ സമരം കൂടുതൽ ശക്തമാക്കാനാണ് സമിതിയുടെ തീരുമാനമെന്നും ജില്ലാ പ്രസിഡൻ്റ് അബു നവാസ് പറഞ്ഞു
