കൊച്ചി : അവയവക്കടത്ത് കേസിൽ അവയവ മാഫിയ പ്രവർത്തിക്കുന്നത് ഹൈദരാബാദ് കേന്ദ്രീകരിച്ചാണെന്ന് പ്രതിയായ സാബിത്ത് നാസർ മൊഴി നൽകി. ഹൈദരാബാദിലെ വ്യക്തിയാണ് അവയവമാഫിയയുമായി തന്നെ ബന്ധിപ്പിച്ചതെന്നും കടത്ത് സംബന്ധിച്ച കാര്യങ്ങൾ ഏകോപിപ്പിക്കുന്നത് ഇയാളാണെന്നും മൊഴിയിലുണ്ട്.
മൊഴിയുടെ അടിസ്ഥാനത്തിൽ ഹൈദരാബാദിലേക്കും പൊലീസ് അന്വേഷണം വ്യാപിപ്പിക്കും. അവയവക്കടത്ത് നടത്തിയവരിൽ ഭൂരിഭാഗവും ബെംഗളൂരു, ഹൈദരാബാദ് നഗരങ്ങളിലെ യുവാക്കൾ ആണെന്ന് സാബിത്ത് നാസർ പൊലീസിനോട് സമ്മതിച്ചിരുന്നു. കേസിൽ സാബിത്ത് ഇരയാക്കിയ പാലക്കാട് സ്വദേശി ഷെമീറിനായുള്ള അന്വേഷണത്തിലാണ് പൊലീസ്.
