പത്തനംതിട്ട: ശബരിമല സ്വർണാപഹരണ കേസുമായി ബന്ധപ്പെട്ട എസ് ഐടി യുടെ സ്വർണ പരിശോധന ഇന്ന് സന്നിധാനത്ത് നടക്കും. പ്രഭാമണ്ഡലം ഇളക്കി സാംപിളുകൾ ശേഖരിക്കുന്നത് വൈകിട്ട് 5 ന് ആരംഭിക്കും.
കട്ടിളപ്പാളിയുടെ മുകളിലാണ് പ്രഭാമണ്ഡലം. കട്ടിളപ്പാളിയുടെ താഴത്തെ ഭാഗവും ഇളക്കി സാംപിൾ ശേഖരിക്കും. കോടതിയിൽ അന്തിമ റിപ്പോർട്ട് നൽകുന്നതിന് ഹൈക്കോടതിയുടെ പ്രത്യേക അനുമതി വാങ്ങിയാണ് എസ് ഐ ടി പരിശോധന നടത്തുന്നത്.
പ്രഭാമണ്ഡലത്തിലെ സ്വർണം ദ്വാരപാലക ശിൽപത്തിനൊപ്പം വേർതിരിച്ച് എടുത്തെന്നാണ് എസ് ഐ ടി കണ്ടെത്തിയത്. കട്ടിളപ്പാളിയിൽ ദശാവതാരങ്ങൾ സ്ഥാപിച്ചതിലെ 2 പാളികൾ, പ്രഭാമണ്ഡലത്തിലെ പാളികൾ എന്നിവ ഉൾപ്പെടെ 7 പാളികളിൽ നിന്ന് സ്വർണം കവർച്ച ചെയ്തെന്നാണ് എസ് ഐ ടി നിരീക്ഷണം.
ഇത് ചെന്നൈ സ്മാർട്ട് ക്രിയേഷനിൽ എത്തിച്ച് വേർതിരിച്ചുവെന്നും അത് കണ്ടെത്താനുമാണ് നിലവിലെ പരിശോധന എന്നും അന്വേഷണ ഉദ്യോഗസ്ഥർ പറഞ്ഞു. ഇക്കാര്യത്തിലെ ശാസ്ത്രീയ പരിശോധന കേസിൽ വഴിത്തിരിവ് ആകാനാണ് സാധ്യത.
