ആലപ്പുഴ: ജില്ലയിലെ എസ്ഐആർ അന്തിമ വോട്ടർ പട്ടിക പ്രസിദ്ധീകരിച്ചു. വിശദാംശങ്ങൾ ഇലക്ഷൻ കമ്മീഷൻ്റെ voters.eci.gov.in എന്ന വെബ് സൈറ്റിലും കേരള ചീഫ് ഇലക്ട്രറൽ ഓഫീസറുടെ ceo.kerala.gov.in എന്ന വെബ് സൈറ്റിലും ഇ സി ഐ നെറ്റ്, വോട്ടർ ഹെൽപ്ലൈൻ എന്നീ ആപ്പുകളിലും ലഭ്യമാണ്.
അന്തിമ പട്ടികയിൽ ജില്ലയിൽ ആകെ 16,70,847 വോട്ടർമാരാണുള്ളത്. 2025 ഡിസംബർ 23 ന് പ്രസിദ്ധീകരിച്ച എസ് ഐ ആർ ഡ്രാഫ്റ്റ് റോളിൽ 16,16,561 പേരാണ് ഉണ്ടായിരുന്നത്. 2002 ലെ എസ് ഐ ആർ പട്ടികയുമായി ബന്ധപ്പെടുത്തുവാൻ കഴിയാതിരുന്ന 1,45,411 പേരുടെയും വോട്ടർ പട്ടികയിൽ ചേർത്ത വിവരങ്ങളിൽ പൊരുത്തക്കേടുകൾ ഉണ്ടായിരുന്ന 110667 പേരുടെയും ഹിയറിംഗ് പൂർത്തിയാക്കിയപ്പോൾ ജില്ലയിൽ എസ് ഐ ആർ വോട്ടർ പട്ടികയിൽ നിന്നും 4405 പേർ മാത്രമാണ് പുറത്തായത്.
വോട്ടർ പട്ടികയുടെ പകർപ്പുകൾ എല്ലാ നിയോജക മണ്ഡല തലത്തിലെയും രാഷ്ട്രീയപാർട്ടി പ്രതിനിധികൾക്ക് നൽകിയിട്ടുണ്ട്. ഇലക്ട്രറൽ രജിസ്ട്രേഷൻ ഓഫീസർമാരുടെ ഓഫീസുകളിലും പൊതു ജനങ്ങൾക്ക് വിവരങ്ങൾ പരിശോധിക്കാം.
