പത്തനംതിട്ട: വടശേരിക്കരയിൽ കാട്ടാനയുടെ ആക്രമണത്തിൽ കടമാൻകുന്ന് മഹാദേവക്ഷേത്രത്തിലെ പാർവതി വിഗ്രഹം തകർന്നു. ഇന്ന് പുലർച്ചെയാണ് ആന ഇവിടെ ഇറങ്ങിയത്. ക്ഷേത്രപരിസരത്തുണ്ടായ കാട്ടാനയുടെ ആക്രമണം പ്രദേശവാസികളിലും ഭക്തജനങ്ങളിലും ആശങ്ക സൃഷ്ടിച്ചു. ക്ഷേത്രത്തിലെ വിഗ്രഹം തകർന്നതോടെ വിശ്വാസികൾക്കിടയിൽ വലിയ പ്രതിഷേധം ഉയർന്നിട്ടുണ്ട്.
വടശേരിക്കര മേഖലയിൽ അടുത്തകാലത്തായി കാട്ടാനകൾ ജനവാസമേഖലകളിൽ പതിവായി ഇറങ്ങുന്നതും കൃഷിയിടങ്ങളിൽ നാശം വിതയ്ക്കുന്നതും നാട്ടുകാരുടെ ആശങ്ക വർധിപ്പിച്ചു. കാട്ടാനശല്യത്തിന് ശാശ്വത പരിഹാരം കാണണമെന്നും ക്ഷേത്രങ്ങൾക്കും വീടുകൾക്കും കൃഷിയിടങ്ങൾക്കും സംരക്ഷണം ഉറപ്പാക്കാൻ വനംവകുപ്പ് അടിയന്തര നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.
