കോട്ടയം: ഗാന്ധിനഗറിൽ നിന്നും 0.91 ഗ്രാം എം.ഡി.എം.എയുമായി യുവാവിനെ ജില്ലാ പൊലീസ് മേധാവിയുടെ ലഹരി വിരുദ്ധ സംഘവും ഗാന്ധിനഗർ പൊലീസും ചേർന്ന് പിടികൂടി. കാരാപ്പുഴ തിരുവാതുക്കൽ എരുത്തിക്കാപ്പറമ്പിൽ റോണി റോയി (24) യെയാണ് ഗാന്ധിനഗർ സ്റ്റേഷൻ ഹൌസ് ഓഫിസർ ഇൻസ്പെക്ടർ ജെർളിൻ വി സ്കറിയയുടെ നേതൃത്വത്തിലുള്ള സംഘം പിടികൂടിയത്.
കാരാപ്പുഴ കേന്ദ്രീകരിച്ചു ജില്ലയിൽ കഞ്ചാവും ലഹരി മരുന്നുകളും വിതരണം ചെയ്യുന്ന ബാദുഷയുടെ സംഘത്തിൽപ്പെട്ടയാളാണ് റോണിയെന്ന് ജില്ലാ പൊലീസ് അറിയിച്ചു. കോട്ടയം ജില്ലയിലെ വിവിധ സ്ഥലങ്ങളിൽ വ്യാപകമായി കഞ്ചാവും ലഹരി മരുന്നുകളും വിതരണം ചെയ്യുന്നതായി ജില്ലാ പൊലീസ് മേധാവിയുടെ ലഹരി വിരുദ്ധ സംഘത്തിനു വിവരം ലഭിച്ചിരുന്നു.
ഇതേ തുടർന്ന് ദിവസങ്ങളോളമായി പൊലീസ് സംഘം പ്രദേശത്ത് നിരീക്ഷണം നടത്തി വരികയായിരുന്നു. ഇതിനിടെയാണ് റോണിയും ലഹരി മാഫിയ സംഘവുമായുള്ള ബന്ധം പൊലീസ് സംഘത്തിന് ലഭിച്ചത്. തുടർന്ന് ഇയാളെ ദിവസങ്ങളോളം നിരീക്ഷിച്ച ശേഷം അറസ്റ്റ് ചെയ്യുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻ്റ് ചെയ്തു.
