റാന്നി: മേനാംതോട്ടത്ത് പൂട്ടിക്കിടന്ന ആശുപതിയിൽ നിന്ന് സീലിംഗ് ഫാനുകൾ ഉൾപ്പെടെയുള്ളവ മോഷ്ടിച്ച സംഭവത്തിൽ 4 കൗമാരക്കാരെ റാന്നി പൊലീസ് കസ്റ്റഡിയിൽ എടുത്തു. അഡ്മിനിസ്ട്രേറ്ററുടെ പരാതിയിൽ എസ്എച്ച് ഒ ജിബു ജോണിൻ്റെ നേതൃത്വത്തിലാണ് 4 കൗമാരക്കാരെ പിടികൂടിയത്.
ബ്രാസ്ടാപ്പുകളും ഫ്രിജിൻ്റെ കംപ്രസറും മറ്റ് കേബിളുകളും ഇവർ അപഹരിച്ചിരുന്നു. കുട്ടികളെ മാതാപിതാക്കളുടെ സാന്നിധ്യത്തിലാണ് കസ്റ്റഡിയിൽ എടുത്തത്. ഇവർ കുറ്റം സമ്മതിച്ചതായി എസ് ഐ കെ. ആർ. ശ്രീകുമാർ പറഞ്ഞു.
കുട്ടികളെ ജുവൈനൽ ജസ്റ്റിസ് ബോർഡ് മുമ്പാകെ ഹാജരാക്കിയ ശേഷം കൗൺസിലിംഗിന് വിധേയമാക്കി. തുടർന്ന് മാതാപിതാക്കൾക്കൊപ്പം വിട്ടയച്ചു. സാധനങ്ങൾ റാന്നിയിലെ ആക്രിക്കടയിൽ നിന്ന് കണ്ടെടുത്തു.
