തിരുവനന്തപുരം: കെഎസ്ആര്ടിസിയില് വനിതകള്ക്കുള്ള സൗജന്യയാത്ര എങ്ങിനെ നടപ്പാക്കണം എന്നതില് സംസ്ഥാന മന്ത്രിസഭായോഗം ഇന്ന് തീരുമാനമെടുക്കും. യുഡിഎഫ് തെരഞ്ഞെടുപ്പ് വാഗ്ദാനമായി പ്രഖ്യാപിച്ച സ്ത്രീകളുടെ സൗജന്യ യാത്ര ജൂണ് 15 മുതല് നടപ്പിലാക്കുമെന്ന് മുഖ്യമന്ത്രിയായി ചുമതലയേറ്റശേഷം വി ഡി സതീശന് വ്യക്തമാക്കിയിരുന്നു.
അത് എങ്ങനെ നടപ്പാക്കണം, മാനദണ്ഡങ്ങള് വേണോ തുടങ്ങിയ കാര്യങ്ങള് യോഗത്തിൽ ചർച്ച ചെയ്യും. മുഖ്യമന്ത്രി അറിയിച്ചത് അനുസരിച്ച് പദ്ധതി നടപ്പാക്കാന് ഇനി 10 ദിവസം മാത്രമാണ് അവശേഷിക്കുന്നത്. കാബിനറ്റിന്റെ ഇന്നത്തെ അജണ്ടയില് ഇല്ലെങ്കിലും, പ്രത്യേക വിഷയമായി ചര്ച്ച ചെയ്യുമെന്നാണ് സൂചന.
നിലവില് ഓര്ഡിനറി- ഫാസ്റ്റ് പാസഞ്ചര് ബസ്സുകളില് പദ്ധതി നടപ്പാക്കാനാണ് സര്ക്കാര് ആലോചിക്കുന്നത്. ഇതിന് 90 കോടി രൂപയാണ് സര്ക്കാരിന് അധികബാധ്യതയായി വരുന്നത്. ഇത് എങ്ങനെ കണ്ടെത്തും എന്നത് അടക്കം മന്ത്രിസഭായോഗം വിശദമായി സംസാരിക്കും.
ആദ്യഘട്ടത്തില് ഓര്ഡിനറി ബസുകളില് പദ്ധതി നടപ്പിലാക്കാനാണ് ഗതാഗതമന്ത്രി സി പി ജോണ് നിര്ദേശം മുന്നോട്ടുവെച്ചതെന്നാണ് റിപ്പോര്ട്ടുകള്. കെഎസ്ആര്ടിസിയുടെ നിലവിലെ സാമ്പത്തിക സ്ഥിതി കണക്കിലെടുത്താണ് മന്ത്രിയുടെ നിലപാട്. എന്നാല് ഫാസ്റ്റ് പാസഞ്ചര് ബസുകളില് കൂടി പദ്ധതി നടപ്പാക്കണമെന്നാണ് മുഖ്യമന്ത്രി വിഡി സതീശന് നൽകുന്ന സൂചന
