കോട്ടയം : തെരഞ്ഞെടുപ്പിന് മുന്നോടിയായി പൂര്‍ത്തിയാക്കുന്ന വികസന പദ്ധതികളുടെ ഭാഗമായി കോട്ടയം മെഡിക്കല്‍ കോളജ് ആശുപത്രിയില്‍ വിവിധ പദ്ധതികൾ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും . മന്ത്രി വീണാ ജോര്‍ജ് അധ്യക്ഷത വഹിക്കും.
284 കോടി രൂപയുടെ പദ്ധതികളാണ് നടപ്പാക്കുന്നത്. സര്‍ജിക്കല്‍ ബ്ലോക്ക്, മെയിന്‍ ഗേറ്റ്, കാത്ലാബ് 32 സ്ലൈസ് സിടി സ്‌കാന്‍, സ്‌കിന്‍ ബാങ്ക്, പാരാമെഡിക്കല്‍ ഹോസ്റ്റല്‍, നവീകരിച്ച ഒപി താഴത്തെ നില, ഗൈനക്കോളജി വിഭാഗത്തില്‍ നിര്‍മിച്ച മാതൃ ശിശു പരിചരണ യൂണിറ്റ്, മുലയൂട്ടല്‍ പരിപാലന കേന്ദ്രം, കുട്ടികള്‍ക്കുള്ള ക്രഷ് എന്നിവ ഇതിലുണ്ട്. പദ്ധതികളുടെ ശിലാസ്ഥാപനവും നടത്തും.
തിരുനക്കരയില്‍ അധ്യാപക സംഘടനയായ കെഎസ് ടിഎയുടെ പൊതുസമ്മേളനം മുഖ്യമന്ത്രി ഉദ്ഘാടനം ചെയ്യും. കെഎസ്ടിഎ പ്രസിഡന്റ് ഡി.സുധീഷ് അധ്യക്ഷത വഹിക്കും. മുഖ്യമന്ത്രിയുടെ സന്ദര്‍ശനത്തോടനുബന്ധിച്ച് കോട്ടയത്ത് ഗതാഗതനിയന്ത്രണം ഏര്‍പ്പെടുത്തിയിട്ടുണ്ട്.
