ആലപ്പുഴ : ആലപ്പുഴ മാന്നാറിൽ 15 വർഷം മുൻപ് കാണാതായ യുവതിയെ കൊന്ന് കുഴിച്ചുമൂടിയെന്ന് സൂചന ലഭിച്ചതിനെത്തുടർന്ന് സെപ്റ്റിക് ടാങ്ക് തുറന്ന് പൊലീസ് പരിശോധന നടത്തി.മാന്നാർ ഇരമത്തൂരിലെ കല എന്ന യുവതിയാണ് കൊല്ലപ്പെട്ടെന്ന് കരുതുന്നത്. കലയുടെ ഭര്‍ത്താവ് അനിലിന്റെ സഹോദരീഭര്‍ത്താവടക്കം അഞ്ചുപേർ പൊലീസ് കസ്റ്റഡിയിലാണ്.
കലയെ മറവുചെയ്തെന്ന് കരുതുന്ന ഇരമത്തൂരിലെ വീട്ടിലെ സെപ്റ്റിക് ടാങ്കുകളുടെ സ്ലാബ് തുറന്ന് പൊലീസ് പരിശോധന നടത്തുകയാണ്. കലയുടെ ഭർത്താവ് അനിൽ ഇസ്രയേലിൽ ജോലി ചെയ്യുകയാണ്.അനിലാണ് കേസിലെ പ്രധാന പ്രതിയെന്നാണ് സൂചന. ഇയാളും മറ്റു പ്രതികളും ചേർന്ന് കലയെ കൊന്ന് സെപ്റ്റിക് ടാങ്കിൽ കുഴിച്ചിട്ടെന്നാണ് അറസ്റ്റിലായവരുടെ മൊഴി. മൂന്നുമാസം മുൻപ് പൊലീസ് സ്റ്റേഷനിൽ ഊമക്കത്ത് ലഭിച്ചതോടെയാണ് അന്വേഷണം ഊർജിതമാക്കിയത്.
