ചങ്ങനാശ്ശേരി: ഡ്രൈഡേയിൽ പത്ര വിതരണത്തിന്റെ മറവിൽ വിദേശ മദ്യവുമായി മധ്യ വയസ്കൻ പോലീസ് പിടിയിൽ. പായിപ്പാട് നാല് കോടി മറ്റക്കാട്ട് ഭാഗത്ത് പുതുപ്പറമ്പിൽ വീട്ടിൽ നാസറി (55) നെയാണ് ജില്ലാ പോലീസ് മേധാവിയുടെ ലഹരി വിരുദ്ധ സംഘവും തൃക്കൊടിത്താനം പോലീസും ചേർന്ന് പിടികൂടിയത്. ഇയാളുടെ കൈവശത്ത് നിന്ന് വിൽപ്പനയ്ക്കായി എട്ടു കുപ്പികളിലായി സുക്ഷിച്ച വിദേശ മദ്യവും കണ്ടെടുത്തു.
ബീവറേജസ് ഔട്ട്ലെറ്റിൽ നിന്നും വിദേശമദ്യം വാങ്ങി ചെറുകുപ്പികളിലാക്കി പത്രവിതരണത്തിന്റെ മറവിൽ ചങ്ങനാശ്ശേരി, നാലുകോടി, ആരമല എന്നീ പ്രദേശങ്ങളിൽ വിൽപ്പന നടത്തുക ആയിരുന്നു. കോട്ടയം ജില്ലാ പോലീസ് മേധാവി ഷാഹുൽ ഹമീദിനു ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ റെയ്ഡിലാണ് പ്രതി പിടിയിലായത്. പ്രതിയെ കോടതിയിൽ ഹാജരാക്കി.
