ന്യൂഡൽഹി : പാക്ക് ചാര വനിതയ്‌ക്കു രഹസ്യങ്ങൾ കൈമാറിയ നാവികസേന ഉദ്യോഗസ്ഥൻ അറസ്റ്റിൽ .നാവികസേനാ ആസ്ഥാനത്ത് ക്ലറിക്കല്‍ പോസ്റ്റില്‍ ജോലി ചെയ്യുന്ന ഹരിയാന സ്വദേശി വിശാല്‍ യാദവാണ് അറസ്റ്റിലായത്. ഓപ്പറേഷന്‍ സിന്ദൂറിന്റേതടക്കം നിര്‍ണായകമായ പല രഹസ്യവിവരങ്ങളും വിശാല്‍ പാകിസ്താന് കൈമാറിയിരുന്നതായാണ് വിവരം.
ഇയാൾ ഐഎസ്‌ഐ അംഗമായ ഒരു യുവതിക്കാണ് വിവരങ്ങള്‍ ചോര്‍ത്തി നല്‍കിയിരുന്നത് എന്ന് തെളിഞ്ഞിട്ടുണ്ട്.വിവരങ്ങൾക്കു പകരമായി ഇയാൾ പണം കൈപ്പറ്റിയിരുന്നുവെന്നു മൊബൈൽ ഫോൺ പരിശോധനയിൽ കണ്ടെത്തി. വിശാൽ യാദവ് ഓൺലൈൻ ഗെയിമുകൾക്ക് അടിമയായിരുന്നുവെന്നും ഇതില്‍ സംഭവിച്ച നഷ്ടങ്ങള്‍ നികത്താനുള്ള പണം ലഭിക്കാൻ വേണ്ടിയാണ് ചാര വൃത്തിയില്‍ ഏര്‍പ്പെട്ടത് എന്നാണ് മൊഴി നല്‍കിയിരിക്കുന്നത്. ഇയാളെ വിവിധ രഹസ്യാന്വേഷണ ഏജൻസികൾ സംയുക്തമായി ചോദ്യം ചെയ്തു വരികയാണ്.
