പത്തനംതിട്ട : ഫേസ്ബുക്കിലൂടെ കണ്ട ഓൺലൈൻ പരസ്യത്തിൽ വിശ്വസിച്ച് 1000 രൂപയ്ക്ക് എൽഇഡി പിക്സൽ ലൈറ്റ് ഓർഡർ ചെയ്ത യുവാക്കൾക്ക് ലഭിച്ചത് പ്രീമിയം മദ്യക്കുപ്പിയിൽ നിറച്ച മനുഷ്യ മൂത്രം. ജില്ലയിലെ അരുവാപ്പുലം സ്വദേശികളായ ഓമനക്കുട്ടനും സുഹൃത്ത് സനുവുമാണ് ഓൺലൈൻ തട്ടിപ്പിന് ഇരയായത്. സംഭവത്തിൽ കോന്നി പോലീസിൽ പരാതി നൽകാനും ഉപഭോക്തൃ കോടതിയെ സമീപിക്കാനും ഒരുങ്ങുകയാണ് യുവാക്കൾ
പൊതുവിപണിയിൽ ഇരട്ടിയിലധികം വിലയുള്ള എൽഇഡി പിക്സൽ ലൈറ്റ് 1000 രൂപയ്ക്ക് ലഭിക്കുമെന്ന പരസ്യമാണ് യുവാക്കളെ ആകർഷിച്ചത്. ഫേസ്ബുക്കിലൂടെ കണ്ട ഓൺലൈൻ വ്യാപാര ലിങ്ക് വഴിയാണ് സനു സുഹൃത്തായ ഓമനക്കുട്ടനുവേണ്ടി ലൈറ്റ് ഓർഡർ ചെയ്തത്. ഒക്ടോബർ ആറിനായിരുന്നു ഓർഡർ നൽകിയത്.ലൈറ്റിന് ഒൻപത് മാസത്തെ ഗ്യാരണ്ടിയും പരസ്യത്തിൽ വാഗ്ദാനം ചെയ്തിരുന്നു. കുറഞ്ഞ വിലയും ഗ്യാരണ്ടിയും വിശ്വസിച്ചാണ് യുവാക്കൾ പണം മുടക്കാൻ തയ്യാറായത്.
ഓർഡർ നൽകിയതിന് ദിവസങ്ങൾക്കുശേഷം പാഴ്സൽ എത്തി. റിപ്പോർട്ട് പ്രകാരം, കഴിഞ്ഞ ദിവസം വൈകിട്ട് 4.30ഓടെയാണ് ഡെലിവറി ബോയ് സാധനം കൈമാറിയത്. പാഴ്സൽ ലഭിച്ച ഉടൻ യുവാക്കൾ 1000 രൂപ കൈമാറുകയും ചെയ്തു. എന്നാൽ പാക്കറ്റ് തുറന്നുനോക്കിയപ്പോൾ പ്രതീക്ഷിച്ച എൽഇഡി ലൈറ്റിന് പകരം പ്രീമിയം മദ്യത്തിന്റെ കുപ്പിയിൽ നിറച്ച മനുഷ്യ മൂത്രമാണ് കണ്ടെത്തിയത്. ഓർഡർ ചെയ്ത ഉൽപ്പന്നം ലഭിക്കാത്തതിനൊപ്പം ഇത്തരമൊരു വസ്തു പാഴ്സലിൽ ഉണ്ടായിരുന്നതും യുവാക്കളെ ഞെട്ടിച്ചു.
പാഴ്സലിൽ നൽകിയിരുന്ന ഫോൺ നമ്പറിൽ ബന്ധപ്പെട്ട് പരാതി അറിയിക്കാൻ യുവാക്കൾ ശ്രമിച്ചു. എന്നാൽ നമ്പറിൽ ഒരു അക്കം കുറവാണെന്ന് പിന്നീട് തിരിച്ചറിഞ്ഞു. നൽകിയിരുന്ന ഇ-മെയിൽ വിലാസവും വ്യാജമാണെന്ന് യുവാക്കൾ പറഞ്ഞു.പാഴ്സൽ അയച്ച സ്ഥാപനത്തിന്റെ വിലാസത്തിലും സംശയങ്ങളുണ്ടെന്ന് ഇവർ പറയുന്നു. ഇതോടെ സാധനം അയച്ചവരെ കണ്ടെത്തി പരാതി അറിയിക്കാനുള്ള ശ്രമവും പ്രതിസന്ധിയിലായി.
ഷാഡോഫാക്സ് ഇന്ത്യ എന്ന ഡെലിവറി സേവനദാതാവിന്റെ ജീവനക്കാരനാണ് പാഴ്സൽ എത്തിച്ചത്. എന്നാൽ ഡെലിവറി നടത്തിയ സ്ഥാപനം തന്നെയാണ് തട്ടിപ്പിന് പിന്നിലെന്ന് ഇതിലൂടെ സ്ഥിരീകരിക്കാനാവില്ല. പാഴ്സൽ അയച്ചവരെക്കുറിച്ചും സംഭവത്തിന്റെ യഥാർഥ സാഹചര്യത്തെക്കുറിച്ചും അന്വേഷണം ആവശ്യമാണ്.
പണം നഷ്ടപ്പെട്ടതിലുപരി ഉപഭോക്താക്കളെ ഇത്തരത്തിൽ കബളിപ്പിച്ചതിലാണ് തങ്ങളുടെ പ്രതിഷേധമെന്ന് യുവാക്കൾ വ്യക്തമാക്കുന്നു. സംഭവത്തിൽ കോന്നി പോലീസിൽ പരാതി നൽകുന്നതിനൊപ്പം ഉപഭോക്തൃ കോടതിയെ സമീപിക്കാനും ഓമനക്കുട്ടനും സനുവും തീരുമാനിച്ചതായി അറിയിച്ചു
