തിരുവല്ല: അപ്പർകുട്ടനാട്ടിൽ പാടശേഖരത്ത് മടവീഴ്ച്ച ഉണ്ടായി ലക്ഷങ്ങളുടെ നഷ്ടം. കഴിഞ്ഞ ദിവങ്ങളിൽ പെയ്ത ശക്തമായ മഴയെ തുടർന്ന് തോട്ടിൽ വെള്ളം ഉയർന്നതോടെയാണ് പെരിങ്ങര അഞ്ചടികാപ്പോണപ്രം പാടശേഖരത്തിൽ മടവീഴ്ച്ച ഉണ്ടായി കൃഷി നശിച്ചത്. 575 ഏക്കർ പാടശേഖരത്തിൽ ആണ് കൃഷി ഇറക്കിയിരുന്നത്. മടവീഴ്ച്ചയിൽ പരിസരത്ത് നിന്നിരുന്ന തെങ്ങ് ഉൾപ്പെടെ കടപുഴകി വീണു. കൃഷി ഇറക്കി 8 – 10 ദിവസങ്ങൾ കഴിഞ്ഞതിന് പുറകെ കാലാവസ്ഥ പെട്ടെന്ന് പ്രതികൂലമാകുകയും, വെളളം ഉയർന്ന് മടവീഴ്ച്ച ഉണ്ടാവുകയും ചെയ്തു . പാടത്ത് വരമ്പ് കുത്തി, ഉഴുത്, വൃത്തിയാക്കി വിതച്ചത് വരെ ഒരു ഏക്കർ കൃഷിക്ക് 10000 – 20000രൂപ ചിലവ് വന്നതായി കർഷകർ പറഞ്ഞു.
വേങ്ങൽ പടിഞ്ഞാറ് കോട്ടയം, ആലപ്പുഴ ജില്ലകളെ ബന്ധിപ്പിക്കുന്ന സ്ഥലത്താണ് പാടശേഖരം. ജ്യോതി ഇനത്തിലുള്ള നെൽ വിത്താണ് ഇക്കുറി ഉപയോഗിച്ചിരുന്നത്. പൂർണ്ണ വളർച്ചയെത്തി വിളവിന് വേണ്ടത് 110 ദിവസമാണ്. കൃഷിയുടെ തുടക്ക സമയത്ത് നല്ല കാലാവസ്ഥ ആയതിനാൽ കർഷകർ വളരെ പ്രതീക്ഷയിൽ ആയിരുന്നു.
അതേ സമയം അപ്പർകുട്ടനാട്ടിൽ മഴ പൂർണമായും വിട്ടുമാറിയിട്ടില്ല. കാർമേഘം മൂടുന്നത് മൂലം ചില സമയങ്ങളിൽ ഇടവിട്ട് മഴ ചാറ്റൽ അനുഭവപ്പെടുന്നുണ്ട്.
