ശബരിമല: ശബരിമലയില് ചെരിപ്പിട്ട് കയറിയ പൊലീസുകാരനെ ഡ്യൂട്ടിയില് നിന്ന് മാറ്റി. ചിങ്ങമാസപൂജയ്ക്ക് നട തുറന്നപ്പോള് സോപാനത്തിന് സമീപം ചെരിപ്പിട്ട് പൊലീസുകാരന് എത്തിയിരുന്നു. അയ്യപ്പഭക്തരില് ഒരാള് മൊബൈല് ഫോണില് ചിത്രം എടുത്തതോടെയാണ് വിവരം പുറത്തറിഞ്ഞത്. ശനിയാഴ്ച രാത്രി 8.15-നാണ് സംഭവം. തിരുവനന്തപുരം എസ്എപി ക്യാംപിലെ സിവില് പൊലീസ് ഓഫീസര് രാജേഷിനെയാണ് ക്യാംപിലേക്ക് തിരിച്ചയച്ചത്.
എന്നാൽ മഴ പെയ്തുകിടന്നതിനാല് ചെരിപ്പുമായി ഓടി സന്നിധാനത്തേക്ക് കയറുകയായിരുന്നെന്നും, ചെരിപ്പ് അഴിച്ചുമാറ്റാന് വിട്ടുപോയെന്നുമാണ് പൊലീസുകാരന്റെ വിശദീകരണം.
അറിയാതെ പറ്റിയതാണെങ്കിലും പൊലീസ് ഈ വിഷയം ഗൗരവമായിട്ടാണ് കാണുന്നത്. അച്ചടക്കലംഘനമായി കണക്കാക്കി അന്വേഷണത്തിന് ശബരിമല പൊലീസ് ചീഫ് കോ-ഓര്ഡിനേറ്ററായ എഡിജിപി എസ്. ശ്രീജിത്ത് ഉത്തരവിട്ടു.
