തിരുവല്ല : അന്താരാഷ്ട്ര വിപണിയിലും ആഭ്യന്തര വിപണിയിലും റബർ വില ഉയർന്നതോടെ സംസ്ഥാനത്ത് പുതിയ മാറ്റങ്ങൾ പ്രകടമാകുന്നു. കർഷകർക്ക് ആശ്വാസമായി വിലക്കയറ്റം തുടരുന്നതിനിടയിൽ, റബർ തോട്ടങ്ങൾ പാട്ടത്തിനെടുത്ത് കൃഷി നടത്താനും കച്ചവടം ചെയ്യാനും പുതിയ സംഘങ്ങൾ സജീവമാകുന്നു.
കഴിഞ്ഞ കുറേ വർഷങ്ങളായി വിലയിടിവും തൊഴിലാക്ഷാമവും കാരണം ജില്ലയിലെ പല കർഷകരും റബർ തോട്ടങ്ങൾ വേണ്ടത്ര പരിപാലിക്കാതെ ഉപേക്ഷിച്ചിരിക്കുകയായിരുന്നു. എന്നാൽ, നിലവിലെ അനുകൂല സാഹചര്യം മുതലെടുത്ത് വലിയ മുതൽമുടക്കുമായി വ്യക്തികളും സംഘങ്ങളും രംഗത്തിറങ്ങുകയാണ്. കരാർ വ്യവസ്ഥയിലും പാട്ടാടിസ്ഥാനത്തിലുമാണ് ഇത്തരം തോട്ടങ്ങൾ ഏറ്റെടുക്കുന്നത്.
പല ഉടമകൾക്കും വാർഷിക പാട്ടത്തുക മുൻകൂറായി നൽകിയാണ് സംഘങ്ങൾ തോട്ടങ്ങൾ ഏറ്റെടുക്കുന്നത്. ടാപ്പിംഗ് മുതൽ വളപ്രയോഗം വരെയുള്ള മുഴുവൻ ചുമതലകളും ഈ സംഘങ്ങളാണ് നിർവഹിക്കുന്നത്. തോട്ടങ്ങളിൽ പണിയെടുക്കാൻ ആളില്ലാത്ത അവസ്ഥയ്ക്ക് വലിയ മുതൽമുടക്കോടെ എത്തുന്ന പുതിയ സംഘങ്ങൾ അത്യാധുനിക സംവിധാനങ്ങളിലൂടെ പരിഹാരം കാണുന്നുണ്ട്.
കൃഷിപ്പണികളിൽ നേരിട്ട് ഏർപ്പെടാൻ പ്രായമായവരോ മറ്റു ജോലികളിൽ വ്യാപൃതരായവരോ ആയ തോട്ടം ഉടമകൾക്ക് അധ്വാനമില്ലാതെ സ്ഥിരമായൊരു വരുമാനം ഉറപ്പാക്കാൻ ഈ പാട്ടക്കരാറുകൾ സഹായിക്കുന്നുണ്ട്.
വിലക്കയറ്റം തോട്ടമേഖലയ്ക്ക് പുത്തൻ ഉണർവ് നൽകുമ്പോൾ, പരമ്പരാഗത കൃഷിരീതികളിൽ നിന്നു മാറി വൻകിട ഏജൻസികളുടെയും സംഘങ്ങളുടെയും കൈകളിലേക്ക് തോട്ടങ്ങൾ മാറിമറിയുന്ന പ്രവണത വരും ദിവസങ്ങളിൽ കൂടുതൽ ചർച്ചകൾക്ക് വഴിവെക്കുമെന്നാണ് വിലയിരുത്തപ്പെടുന്നത്.
