കോട്ടയം: തിരുനക്കര ബസ് സ്റ്റാൻഡിൽ യാത്രക്കാരിയുടെ ശരീരത്തിലൂടെ ബസ് കയറി ഇറങ്ങി. സംസ്ഥാന ഹാൻഡ്ലൂം കോ- ഓപ്പറേറ്റീവ് സൊസൈറ്റിയിലെ പാർട്ട് ടൈം ജീവനക്കാരിയായ കോട്ടയം നട്ടാശ്ശേരി ഞള്ളക്കാട്ടു വീട്ടിൽ റോസ് സി ഡി യാണ് സ്റ്റാൻഡിൽ വന്നിറങ്ങിയ അതേ ബസിന് അടിയിൽപ്പെട്ടത്. ഇന്ന് രാവിലെ 9.45 ഓടെയാണ് സംഭവം.
തിരുനക്കര സ്റ്റാൻഡിലെ ബസ് ബേയിൽ നിർത്തിയപ്പോൾ റോസ് ഇതിൽ നിന്നിറങ്ങി ബസിൻ്റെ ഇടതു വശം ചേർന്ന് മറികടക്കുമ്പോൾ യാത്രക്കാരി മുന്നിലുള്ളത് അറിയാതെ ഡ്രൈവർ ബസ് മുന്നോട്ട് എടുത്തപ്പോൾ ഇതിനടിയിൽ പ്പെടുകയായിരുന്നു.
ഇടതു വശത്തെ ചക്രമാണ് റോസിൻ്റെ ശരീരത്തിലൂടെ കയറിയിറങ്ങിയത്. ശബ്ദം കേട്ട ഉടൻ തന്നെ യാത്രക്കാരും, പോലീസും ചേർന്ന് ഇവരെ പുറത്തെടുത്ത് കോട്ടയം മെഡിക്കൽ കോളജ് ആശുപത്രിയിൽ എത്തിച്ചു. വയറിനും, മുഖത്തും പരിക്കേറ്റ യാത്രക്കാരിയെ അടിയന്തര ശസ്ത്രക്രിയക്ക് വിധേയമാക്കി. കോട്ടയം വെസ്റ്റ് പോലീസ് സ്ഥലത്തെത്തി വേണ്ട നടപടി സ്വീകരിച്ചു.
