തിരുവല്ല: തദ്ദേശസ്വയംഭരണ സ്ഥാപനങ്ങളുടെ പ്ലാൻ ഫണ്ട്, പുതുക്കിയ ബജറ്റിൽ വെട്ടികുറച്ച് വികസന പ്രവർത്തനങ്ങൾ അവതാളത്തിലാക്കിയ
യുഡിഎഫ് സർക്കാരിന്റെ നടപടിക്കെതിരെ തദ്ദേശ സ്വയംഭരണ സ്ഥാപനങ്ങളിലേക്ക് എൽഡിഎഫ് നേതൃത്വത്തിൽ മാർച്ചും ധർണയും ആഗസ്റ്റ് 3-ന് നടക്കും. തിരുവല്ല നഗരസഭയിലേക്കുള്ള മാർച്ച് ഇന്ത്യൻ സോഷ്യലിസ്റ്റ് ജനതാദൾ സംസ്ഥാന പ്രസിഡന്റ് അഡ്വ.മാത്യു ടി തോമസ് ഉദ്ഘാടനം ചെയ്യുമെന്ന് എൽഡിഎഫ് നിയോജക മണ്ഡലം കൺവീനർ അഡ്വ. ആർ.സനൽ കുമാർ അറിയിച്ചു. മണ്ഡലം നേതൃയോഗത്തിലാണ് തീരുമാനം.
തിരുവല്ല നഗരസഭയിലെ മാലിന്യ സംസ്കരണ പ്രശ്നത്തിലും നഗരസഭയുടെ സ്ഥലം കോൺഗ്രസ് നേതാവിന് പതിച്ച് നൽകാനുള്ള ഭരണ സമിതിയുടെ തീരുമാനത്തിലും എൽഡിഎഫ് മണ്ഡലം നേതൃയോഗം പ്രതിഷേധിച്ചു. എൽഡിഎഫ് സർക്കാരിന്റെ ശ്രമഫലമായി തിരുവല്ലയ്ക്ക് ലഭിച്ച നേട്ടങ്ങൾ അട്ടിമറിയ്ക്കാനുള്ള എംഎൽഎയുടെ ശ്രമം ഉപക്ഷിക്കണം.
തെരഞ്ഞെടുപ്പ് പെരുമാറ്റചട്ടം ലംഘിച്ച് മണ്ഡലത്തിൽ ബിജെപി സ്ഥാനാർഥി
അനൂപ് ആന്റണി ചെലവഴിച്ച പണത്തെ സംബന്ധിച്ച് തെരഞ്ഞെടുപ്പ് കമ്മിഷന് നൽകിയ പരാതിയിന്മേൽ കമ്മിഷൻ തുടർ നടപടി സ്വീകരിക്കണമെന്നും അനധികൃത പണത്തിന്റെ ശ്രോതസ്സുകളെ സംബന്ധിച്ച് ബിജെപി സംസ്ഥാന നേതൃത്വത്തിൽ തന്നെ ആരോപണങ്ങൾ ഉയർന്നു വന്നിരിക്കുന്ന സാഹചര്യത്തിൽ വിഷയത്തിന്റെ പ്രാധാന്യം കൂടുതൽ ഗൗരവമുള്ളതായും യോഗം വിലയിരുത്തി.
സാം കുളപ്പള്ളി അധ്യക്ഷനായി. എൽഡിഎഫ് ജില്ലാ കൺവീനർ അലക്സ് കണ്ണമല ഉദ്ഘാടനം ചെയ്തു. ചെറിയാൻ പോളച്ചിറയ്ക്കൽ, അഡ്വ. രതീഷ് കുമാർ, ഫ്രാൻസിസ് വി.ആന്റണി, സി.എൻ രാജേഷ്, കൃഷ്ണൻ കുട്ടി, ബേബി തോട്ടത്തിൽ, പി.സി. രാജു, ബാബു കൂടത്തിൽ, മുഹമ്മദ് സലിം, അബ്ദുൽ റഹിം തുടങ്ങിയവർ പ്രസംഗിച്ചു.
