ശബരിമല : ശബരിമല ദര്ശനത്തിനുള്ള വെര്ച്വല് ക്യൂ ബുക്ക് ചെയ്തവരുടെ എണ്ണവും ദർശനത്തിന് എത്തുന്നവരുടെ എണ്ണവും തമ്മിൽ വലിയ വ്യത്യാസം .സ്ലോട്ടുകള് മുന്കൂട്ടി ബുക്ക് ചെയ്തിട്ടും വലിയൊരു വിഭാഗം ഭക്തര് ദര്ശനത്തിനെത്തുന്നില്ല .വെര്ച്വല് ക്യൂ സംവിധാനത്തില് ക്രമക്കേടുകള് നടക്കുന്നുണ്ടോയെന്ന പരിശോധന ശക്തമാക്കാന് ദേവസ്വം ബോര്ഡ് തീരുമാനിച്ചു.
വിർച്വൽ ക്യൂ വഴി ദിവസവും 66,000 പേർക്കാണ് ശബരിമലയിൽ ദർശനത്തിന് അവസരമുള്ളത്.ഈ മാസം 25 വരെയുള്ള വെര്ച്വല് ക്യൂ ബുക്കിങ് ഇതിനോടകം പൂര്ത്തിയായിട്ടുണ്ട്.കഴിഞ്ഞ ദിവസം വെര്ച്വല് ക്യൂ വഴി ബുക്ക് ചെയ്ത 58,697 പേരില് 37,341 പേര് മാത്രമാണ് ദര്ശനത്തിനെത്തിയത്.
ടൂര് ഏജന്സികളും ട്രാവല് ഏജന്റുമാരും കൂട്ടത്തോടെ സ്ലോട്ടുകള് ബുക്ക് ചെയ്തശേഷം ദര്ശനത്തിന് ആഗ്രഹിക്കുന്ന ഭക്തരില്നിന്ന് അമിത തുക ഈടാക്കി അവസരം ഒരുക്കുന്ന തട്ടിപ്പാണോ നടക്കുന്നതെന്നാണ് സംശയിക്കുന്നത് .തീർഥാടകരുടെ എണ്ണം കുറഞ്ഞതിൽ അസ്വാഭാവികത ഉണ്ടോ എന്ന് അന്വേഷിക്കാൻ ദേവസ്വം മന്ത്രി നിർദേശം നൽകിയിട്ടുണ്ട്.





