കോഴഞ്ചേരി: ലോക പരിസ്ഥിതി ദിനത്തിൽ സ്കൂൾ വളപ്പിൽ സൂര്യകാന്തിപ്പൂക്കളുടെ പ്രഭാവലയം. കോഴഞ്ചേരി ഗവ.ഹൈസ്കൂൾ പരിസരത്താണ് സൂര്യകാന്തിത്തോട്ടം മനോഹാരിത തീർക്കുന്നത്. ബിആർസിയിലെ അധ്യാപകരുടെ ഒത്തൊരുമയിലാണ് സൂര്യകാന്തിപ്പാടം സ്കൂൾ മുറ്റത്ത് വിരിഞ്ഞത്. ഭിന്നശേഷി കുട്ടികളുടെ മാനസിക വളർച്ചയ്ക്കും ശാരീരികോല്ലാസത്തിനും വേണ്ടിയാണ് സമഗ്ര ശിക്ഷ കേരളയും ഭാരത് ഭവനും സംയുക്തമായി സൂര്യകാന്തിച്ചെടികൾ നട്ടുപിടിപ്പിച്ചത്.
കോഴഞ്ചേരി ഓട്ടിസം സെന്ററിലെ 45 ഭിന്നശേഷി കുട്ടികൾക്കും കോഴഞ്ചേരി ഗവ.ഹൈസ്കൂളിലെ 15 ഓളം കുട്ടികൾക്കും ജൈവ തെറാപ്പി നൽകുന്നതിനും വേണ്ടിയാണ് അഞ്ഞൂറോളം ഗ്രോ ബാഗുകളിൽ ഇവിടെ സൂര്യകാന്തിത്തോട്ടം ഒരുക്കിയതെന്ന് സ്കൂൾ അധികൃതർ പറഞ്ഞു. സമഗ്ര ശിക്ഷ കേരളയിലെ ഡിപിസി ഡോ. ലെജു കെ.തോമസ്, സ്പെഷൽ എജ്യുക്കേറ്റർ പ്രിയ പി.നായർ എന്നിവരാണ് പദ്ധതിയ്ക്ക് നേതൃത്വം നൽകുന്നത്
