കോന്നി : പുനലൂർ – മൂവാറ്റുപുഴ പ്രധാനപാതയിൽ മുറിഞ്ഞകല്ലിൽ അപകടങ്ങൾ തുടർക്കഥയാകുന്നു. ശബരിമല തീർത്ഥാടകർ സഞ്ചരിച്ച ഇന്നോവ കാർ നിയന്ത്രണം വിട്ട് വൈദ്യുതി തൂണിൽ ഇടിച്ച് അപകടം ഉണ്ടായത് ഇന്ന് ഉച്ചയ്ക്ക്. അപകടത്തിൽ ആന്ധ്രാ സ്വദേശികളായ 5 പേർക്ക് പരുക്കേറ്റു. ഇവരെ കോന്നി താലൂക്ക് ആശുപത്രിയിൽ പ്രവേശിപ്പിച്ചു.
ഈ അപകടത്തിന് തൊട്ടു മുൻപ് എലിയറക്കലിന് സമീപം പേരൂർകുളത്ത് ഫർണിച്ചർ കയറ്റി വന്ന പിക് അപ് വാനിൽ ശബരിമല തീർഥാടകർ സഞ്ചരിച്ച വാഹനം ഇടിച്ചാണ് അപകടം ഉണ്ടായത്. തമിഴ്നാട് സ്വദേശികളായ 3 പേർക്ക് പരുക്കേറ്റു. ഇവരെയും കോന്നി താലൂക്ക് ആശുപത്രിയിൽ പ്രവേശിപ്പിച്ചു.
കഴിഞ്ഞ ആഴ്ച മുറിഞ്ഞ കല്ലിൽ ഉണ്ടായ വാഹനാപകടത്തിൽ നവദമ്പതികൾ ഉൾപ്പെടെ ഒരു കുടുംബത്തിലെ നാല് പേർ മരിച്ചതിൻ്റെ ഭീതി ഒഴിയും മുൻപേയാണ് മുറിഞ്ഞകല്ലിൽ വീണ്ടും അപകടങ്ങൾ തുടർക്കഥയാകുന്നത്
