തിരുവനന്തപുരം : ശസ്ത്രക്രിയക്കിടെ കയ്യുറ മുറിവിൽ തുന്നിച്ചേർത്തതായി പരാതി. തിരുവനന്തപുരം ജനറൽ ആശുപത്രിക്കെതിരെയാണ് ആരോപണം. എന്നാൽ ഇത് ചികിത്സാപിഴവില്ലെന്ന് ആശുപത്രി അധികൃതർ പറയുന്നു. മുതുകിലെ മുഴ നീക്കംചെയ്യുന്ന ശസ്ത്രക്രിയക്ക് ശേഷം മുറിവിൽ ഗ്ലൗസ് ചേർത്തുവച്ച് തുന്നിയെന്നാണ് ആരോപണം.സംഭവത്തിൽ നെടുമങ്ങാട് സ്വദേശിയായ ഷിനു പോലീസിൽ പരാതി നൽകി.
കഴിഞ്ഞ ശനിയാഴ്ച രാവിലെ 8 മണിക്കായിരുന്നു ശസ്ത്രക്രിയ.12 മണിയോടെ ശസ്ത്രക്രിയ പൂർത്തിയാക്കി മടങ്ങി.രണ്ട് ദിവസം കഴിഞ്ഞിട്ടും വേദനയും നീരും മാറാതെ വന്നതോടെ പരിശോധിച്ചപ്പോഴാണ് സ്റ്റിച്ച് ഇട്ട ഭാഗത്ത് കയ്യുറയും തുന്നിച്ചേർത്തായി കണ്ടതെന്നും പരാതിയിൽ പറയുന്നു.
എന്നാൽ ഇത് പിഴവല്ലെന്നും പഴുപ്പും രക്തവും കളയാനുള്ള ഗ്ലൗ ഡ്രെയ്ൻ സിസ്റ്റം ആണെന്നും ആശുപത്രി അധികൃതർ അറിയിച്ചു .അത് ഇളക്കി കളയണം എന്ന് രോഗിയോട് നിർദേശിച്ചിരുന്നതായും അധികൃതർ വ്യക്തമാക്കി.
