കോട്ടയം : മലങ്കര മൽപ്പാനും പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവായുടെ പ്രിൻസിപ്പൽ സെക്രട്ടറിയും സഭാ വക്താവുമായ ഡോ ജോൺസ് ഏബ്രഹാം കോനാട്ട് റീശ് കോർ എപ്പിസ്ക്കോപ്പായ്ക്ക് ഇന്ന് എഴുപതാം പിറന്നാൾ.
മൽപ്പാനച്ചന്റെ മാതൃ ഇടവകയായ പാമ്പാക്കുട സെന്റ് ജോൺസ് എഫേസോസ് ഓർത്തഡോക്സ് വലിയപള്ളിയിൽ ഞായർ (നാളെ ) വൈകീട്ട് 7 മണിക്ക് സംഘടിപ്പിക്കുന്ന സപ്തതി സമ്മേളനം പരിശുദ്ധ കാതോലിക്കാ ബാവാ ഉദ്ഘാടനം ചെയ്യും. ഫ്രാൻസിസ് ജോർജ് എം.പി അധ്യക്ഷത വഹിക്കും.
അനൂപ് ജേക്കബ് എം.എൽ.എ, സഭാ വൈദിക ട്രസ്റ്റി ഫാ.ഡോ.തോമസ് വർഗീസ് അമയിൽ, അൽമായ ട്രസ്റ്റി റോണി വർഗീസ് ഏബ്രഹാം, അസോസിയേഷൻ സെക്രട്ടറി അഡ്വ.ബിജു ഉമ്മൻ എന്നിവർ പ്രസംഗിക്കും. പൊതുസമ്മേളനത്തിന് മുന്നോടിയായി ഇടവകയിലെ 21 കുടുംബയൂണിറ്റുകളുടെ സംയുക്തവാർഷികം നടക്കും.
സപ്തതി നിറവിലുള്ള ഇടവകാംഗങ്ങളെ ആദരിക്കും. സപ്തതി ആഘോഷത്തിന്റെ ഭാഗമായി ഹൃദയശസ്ത്രക്രിയ സഹായ പദ്ധതിയും പ്രഖ്യാപിക്കുമെന്ന് ഇടവകഭരണസമിതിക്ക് വേണ്ടി സഹവികാരിമാരായ ഫാ.പോൾ ജോൺ കോനാട്ട്, ഫാ.ടോം ബേബി, ഫാ.ജോൺ പുത്തൂരാൻ എന്നിവർ അറിയിച്ചു.
