കൊച്ചി: വനിതാ കണ്ടക്ടർമാർക്ക് ആർ‍ത്തവാവധി അനുവദിക്കാനാവില്ലെന്ന നിലപാട് കെഎസ്ആർടിസി ഹൈക്കോടതിയെ അറിയിച്ചു. കോർപ്പറേഷനിന് ഇത്രയും അധിക ബാധ്യതകൾ താങ്ങാൻ കഴിയില്ലെന്നും, ആർ‍ത്തവാവധി അനുവദിക്കുന്നത് കെഎസ്ആർടിസിയുടെ പ്രവർത്തനത്തെ ഗുരുതരമായി ബാധിക്കുമെന്നും അധികൃതർ വ്യക്തമാക്കി.
ആർ‍ത്തവകാലത്ത് ശമ്പളത്തോടുകൂടിയ രണ്ട് ദിവസത്തെ അവധി അനുവദിക്കണമെന്നാവശ്യപ്പെട്ട് KSRTC യിലെ ഫോറം ഫോർ ജസ്റ്റിസ് എന്നസംഘടനയുടെ നേതൃത്വത്തിൽ വനിതാ ജീവനക്കാർ സമർപ്പിച്ച ഹർജിയിലാണ് കെഎസ്ആർടിസി നിലപാട് അറിയിച്ചത്. ഇത്തരമൊരു അവധി നൽകുന്നത് സർവീസുകളുടെ ക്രമീകരണത്തെയും സമയബന്ധിത പ്രവർത്തനത്തെയും പ്രതികൂലമായി ബാധിക്കുമെന്നാണ് കെഎസ്ആർടിസിയുടെ വാദം.
ആർ‍ത്തവാവധി അനുവദിക്കണമെന്നത് ഒരു പൊതുനയപരമായ തീരുമാനം ആണെന്നും, അതിന് സർക്കാർ തലത്തിലുള്ള ഇടപെടൽ ആവശ്യമാണെന്നും കെഎസ്ആർടിസി വ്യക്തമാക്കി. കോർപ്പറേഷൻ സ്വതന്ത്രമായി ഇത്തരമൊരു തീരുമാനം കൈക്കൊള്ളാൻ സാധ്യമല്ലെന്നും കോടതിയെ അറിയിച്ചു.
അതേസമയം കർണാടക ആർടിസിയിൽ വനിതാ ജീവനക്കാർക്ക് മാസത്തിൽ ഒരു ദിവസം ശമ്പളത്തോടുകൂടിയ ആർ‍ത്തവാവധി നിലവിലുണ്ട്. 18 മുതൽ 52 വയസ് വരെയുള്ള ജീവനക്കാരെയാണ് ഈ ആനുകൂല്യത്തിൽ ഉൾപ്പെടുത്തിയിരിക്കുന്നത്.
