ന്യൂഡല്‍ഹി: ജമ്മു കശ്മീരിൽ മഴക്കെടുതിയില്‍ മരിച്ചവരുടെ എണ്ണം 11 കടന്നു. അതിര്‍ത്തി ജില്ലകളായ പൂഞ്ച്, രജൗരി എന്നിവിടങ്ങളില്‍ മരണം നടന്നതായി റിപ്പോര്‍ട്ട് ചെയ്തിരിക്കുന്നത്. നിരവധി പേരെ കാണാതായിട്ടുണ്ട്. രക്ഷാപ്രവര്‍ത്തനം പുരോഗമിക്കുകയാണ്. അമര്‍നാഥ് യാത്രയും ജമ്മുവിലെ മാതാ വൈഷ്‌ണോദേവി, ശിവ് ഖോരി ആരാധനാലയങ്ങളിലേക്കുള്ള തീര്‍ത്ഥാടനവും അധികൃതര്‍ താല്‍ക്കാലികമായി നിര്‍ത്തിവച്ചു. ദുരിതബാധിതരുടെ സുരക്ഷയ്‌ക്കായി സാധ്യമായ എല്ലാ സഹായവും കേന്ദ്ര സർക്കാർ ഉറപ്പ് നല്‍കി.
പൂഞ്ച് ജില്ലയിലാണ് കൂടുതല്‍ നാശനഷ്ടമുണ്ടായത്. ബുഫ്‌ലിയാസ് പ്രദേശത്ത് വീടുകളും വാഹനങ്ങളും വെള്ളപ്പൊക്കത്തില്‍ ഒലിച്ചുപോയി. ആറ് മൃതദേഹങ്ങള്‍ ഇവിടെ നിന്ന് കണ്ടെടുത്തു. മണ്ണിടിച്ചില്‍ ഗതാഗതം തടസ്സപ്പെട്ടു. പൂഞ്ച്, രജൗരി, കിഷ്ത്വാര്‍ ജില്ലകളില്‍ ഒന്നിലധികം മേഘവിസ്‌ഫോടനങ്ങള്‍ ഉണ്ടായതായി അധികൃതര്‍ അറിയിച്ചു.
