പത്തനംതിട്ട : സംസ്ഥാനത്തെ പൊതുമേഖലാ മദ്യവിൽപനശാലകളായ ബെവ്‌കോ ഔട്ട്‌ലെറ്റുകളിൽ കുറഞ്ഞവിലയുള്ള മദ്യത്തിന് രൂക്ഷമായ ക്ഷാമം. സാധാരണക്കാർ കൂടുതലായി ആശ്രയിക്കുന്ന വിലകുറഞ്ഞ ബ്രാൻഡുകൾ കിട്ടാനില്ലാത്തതോടെ ഉപഭോക്താക്കൾ വൻകിട കമ്പനികളുടെ വിലകൂടിയ മദ്യം വാങ്ങാൻ നിർബന്ധിതരാകുകയാണ്.
കുറഞ്ഞ വിലയിലുള്ള മദ്യത്തിന്റെ ഉത്പാദനത്തിലും വിതരണത്തിലുമുണ്ടായ കുറവാണ് നിലവിലെ പ്രതിസന്ധിക്ക് കാരണം. ഇതിന് പുറമെ വിദേശമദ്യ ഡിപ്പോകളിൽ നിന്നും ഔട്ട്‌ലെറ്റുകളിൽ നിന്നും ലോഡ് ഇറക്കുന്നതിലുള്ള സ്ഥലപരിമിതിയും വിതരണത്തെ ബാധിക്കുന്നുണ്ട്. ആവശ്യത്തിന് സ്റ്റോക്ക് സൂക്ഷിക്കാൻ സ്ഥലമില്ലാത്തതിനാൽ വിതരണം കാര്യക്ഷമമായി നടത്തുന്നതിൽ ജീവനക്കാരും പ്രയാസപ്പെടുകയാണ്.
വിലകുറഞ്ഞ മദ്യത്തിന്റെ ലഭ്യതക്കുറവ് വൻകിട മദ്യക്കമ്പനികൾക്ക് വിപണിയിൽ മേൽക്കൈ നേടാൻ വഴിയൊരുക്കുന്നു എന്ന ആക്ഷേപവും ശക്തമാണ്. വിഷയം ഗൗരവമായി കണ്ട് കുറഞ്ഞവിലയിലുള്ള മദ്യത്തിന്റെ വിതരണം പുനഃസ്ഥാപിക്കാനും ഡിപ്പോകളിലെ അടിസ്ഥാന സൗകര്യങ്ങൾ വർധിപ്പിക്കാനും അടിയന്തര നടപടി വേണമെന്നാണ് ഉപഭോക്താക്കളുടെ ആവശ്യം.
