കോഴഞ്ചേരി : ജില്ലയിൽ ഷിഗെല്ല രോഗം സ്ഥിരീകരിച്ച ആറന്മുളയിൽ പ്രതിരോധ, ശുചീകരണ പ്രവർത്തനങ്ങൾ ആരംഭിച്ചു. പത്ത് വയസുകാരിക്ക് ഷിഗെല്ല ബാധിച്ച എഴിക്കാട് ഭാഗം ഡി എം ഒ ഡോ. അനിതകുമാരി, പഞ്ചായത്ത് പ്രസിഡൻ്റ് ഷാജി ചാക്കോ , വാർഡ് മെമ്പർ ശ്രീനി ചാണ്ടിശേരി, മെഡിക്കൽ ഓഫിസർ ഡോ. എ. ഗായത്രി എന്നിവരുടെ നേതൃത്വത്തിൽ സന്ദർശിച്ചു. നിലവിൽ കുട്ടി രോഗമുക്തയാണെന്നും വീട്ടിൽ മറ്റാർക്കും രോഗ ബാധ ഇല്ലെന്നും ഡി എം ഒ അറിയിച്ചു.
എന്നാൽ ആറന്മുളയിൽ കുട്ടിക്ക് ഷിഗെല്ല രോഗം വരാൻ കാരണം പുറത്ത് നിന്ന് വാങ്ങിയ പൊറോട്ടയും ചിക്കനും കഴിച്ചതിന് ശേഷമാണെന്നാണ് ആരോഗ്യ വകുപ്പിൻ്റെ പ്രാഥമിക നിഗമനം. ഭക്ഷണം രണ്ട് ദിവസം ചൂടാക്കി കഴിച്ചു. വൈകാതെ കുട്ടിക്ക് വയറിളക്കം ഉണ്ടായി. തുടർന്ന് കോഴഞ്ചേരി ജില്ലാ ആശുപത്രിയിൽ എത്തിച്ച് പരിശോധന നടത്തിയപ്പോഴാണ് രോഗം സ്ഥിരീകരിക്കുകയും ചികിത്സ ആരംഭിച്ചതും ചെയ്തത്.
