പത്തനംതിട്ട : കേന്ദ്ര-സംസ്ഥാന സർക്കാരുകളുടെ സോളാർ പ്രോത്സാഹന പദ്ധതികളിൽ വിശ്വസിച്ച്, ബാങ്ക് വായ്പയെടുത്തും സമ്പാദ്യം വിനിയോഗിച്ചും വീടുകളിൽ സോളാർ പ്ലാന്റുകൾ സ്ഥാപിച്ച ഉപഭോക്താക്കൾ കെഎസ്ഇബിയുടെ മെല്ലെപ്പോക്ക് മൂലം കടുത്ത പ്രതിസന്ധിയിലാണെന്ന് ഇന്ത്യൻ കൺസ്യൂമേഴ്സ് ഫോറം കേന്ദ്രകമ്മിറ്റി യോഗം കുറ്റപ്പെടുത്തി.
സംസ്ഥാനത്തൊട്ടാകെ പതിനായിരക്കണക്കിന് അപേക്ഷകരും പത്തനംതിട്ട ജില്ലയിൽ മാത്രം ആയിരത്തിലധികം ഉപഭോക്താക്കളുമാണ് പ്ലാന്റ് നിർമ്മാണം പൂർത്തിയായിട്ടും നെറ്റ് മീറ്ററുകൾ ഘടിപ്പിക്കാനാകാതെ കാത്തിരിക്കുന്നത്. പ്രത്യേകിച്ച് ത്രീ-ഫേസ് മീറ്ററുകളുടെ കടുത്ത ക്ഷാമമാണ് നിലനിൽക്കുന്നത്.
പ്ലാന്റുകൾ സജ്ജമായിട്ടും ഉത്പാദിപ്പിക്കുന്ന വൈദ്യുതി ഗ്രിഡിലേക്ക് നൽകാനോ ഉപയോഗിക്കാനോ കഴിയാത്തതിനാൽ വൻ ഊർജ്ജനഷ്ടമാണ് പ്രതിദിനം ഉണ്ടാകുന്നത്. ഇതിനുപുറമെ, പ്ലാന്റ് സ്ഥാപിക്കാൻ എടുത്ത വായ്പയുടെ തിരിച്ചടവും സാധാരണ വൈദ്യുതി ബില്ലും ഒരുപോലെ അടയ്ക്കേണ്ടി വരുന്നത് സാധാരണക്കാരുടെ കുടുംബ ബജറ്റ് താളം തെറ്റിച്ചിരിക്കുകയാണ്.
കെ എസ്.ഇ.ബിയും സർക്കാരും അടിയന്തരമായി ഇടപെടണമെന്ന് യോഗം ആവശ്യപ്പെട്ടു. സ്റ്റോക്ക് ലഭ്യത ഉറപ്പുവരുത്തി മാസങ്ങളായി കാത്തിരിക്കുന്ന മുഴുവൻ ഉപഭോക്താക്കൾക്കും അടിയന്തരമായി നെറ്റ് മീറ്ററുകൾ നൽകണമെന്നും, വിതരണത്തിൽ സുതാര്യത ഉറപ്പാക്കാൻ ഓരോ സെക്ഷൻ ഓഫീസുകളിലെയും മുൻഗണനാ പട്ടിക പരസ്യപ്പെടുത്തണമെന്നും ഫോറം ആവശ്യപ്പെട്ടു.
