തിരുവല്ല : സ്വകാര്യ മെഡിക്കൽ കോളേജ് ആശുപത്രിയിൽ പ്രസവത്തെ തുടർന്ന് യുവതി മരിച്ചു.ആലപ്പുഴ എടത്വ കൊടുപ്പുന്ന കോലത്ത് തൃക്കാർത്തികയിൽ കെ.ജെ. മോഹനന്റെ മകൾ നിത്യ മോഹനൻ (28) ആണ് തിരുവല്ലയിലെ സ്വകാര്യ മെഡിക്കൽ കോളേജിൽ മരിച്ചത്.
വെള്ളിയാഴ്ച രാവിലെ 6 മണിയോടെയാണ് നിത്യയെ ആശുപത്രിയിൽ പ്രവേശിപ്പിച്ചത്. രാവിലെ 11 മണിയോടെ സിസേറിയനിലൂടെ നിത്യ ഇരട്ടക്കുട്ടികൾക്ക് ജന്മം നൽകി. പിന്നിട് രക്തസ്രാവം നിലയ്ക്കാത്തതിനെ തുടർന്ന് ഡോക്ടർമാർ വീട്ടുകാരെ അറിയിച്ചു.
ഉച്ചയ്ക്ക് 3 മണിയോടെ നിത്യയ്ക്ക് ഹൃദയസംബന്ധമായ തകരാറുണ്ടെന്നും വെന്റിലേറ്ററിലേക്ക് മാറ്റുകയാണെന്നും ആശുപത്രി അധികൃതർ പറഞ്ഞു. ഇതു കഴിഞ്ഞ് വീട്ടുകാരെ കാണാൻ അനുവദിച്ചില്ലെന്നും മറ്റ് ആശുപത്രികളിലേക്ക് മാറ്റാൻ സമ്മതിച്ചില്ലെന്നും ബന്ധുക്കൾ ആരോപിച്ചു. വൈകിട്ട് 6 മണിയോടെ നിത്യ മരിച്ചതായി ആശുപത്രി അധികൃതർ അറിയിക്കുകയായിരുന്നു
