തിരുവല്ല: ശുചിത്വവും ആരോഗ്യവും ഉറപ്പുവരുത്തുന്ന മാലിന്യ വിമുക്ത സമൂഹമാണ് നാം ലക്ഷ്യം വയ്ക്കേണ്ടതെന്നും അതിനായി യുവജനങ്ങൾ മുന്നിട്ടിറങ്ങണമെന്നും അഡ്വ വർഗീസ് മാമ്മൻ എം എൽ എ. വൈ.എം.സി.എ സബ് റീജിയന്റെ ആഭിമുഖ്യത്തിൽ സംഘടിപ്പിച്ച വൈ.എം.സി.എ യുടെ 182-ാം സ്ഥാപക ദിനാഘോഷ സമ്മേളനം തെങ്ങേലി മാർ ഡൈനേഷ്യസ് ബാലികാ ഭവനിൽ ഉദ്ഘാടനം ചെയ്യുകയായിരുന്നു അദ്ദേഹം.
ഇന്നത്തെ ലോകം വിഭജനങ്ങളും അസഹിഷ്ണുതയും മൂല്യച്യുതിയും നേരിടുമ്പോൾ വൈ.എം.സി.എ യുടെ ദൗത്യം കൂടുതൽ പ്രസക്തമാകുകയാണെന്നും സ്നേഹവും നീതിയും സമാധാനവും ഉൾക്കൊള്ളുന്ന സമൂഹനിർമ്മാണത്തിനായി യുവജനങ്ങളെ പ്രാപ്തരാക്കുക എന്നത് നമ്മുടെ ഉത്തരവാദിത്വമാണെന്നും അദ്ദേഹം പറഞ്ഞു.
സബ് റീജൺ ചെയർമാൻ ജോജി പി. തോമസ് അധ്യക്ഷത വഹിച്ചു. കേരള റീജൻ വൈസ് ചെയർമാൻ കുര്യൻ തൂമ്പുങ്കൽ മുഖ്യപ്രഭാഷണം നടത്തി. കുറ്റൂർ വൈ.എം.സി.എ പ്രസിഡൻ്റ് ഫാ. വി.എ ഏബ്രഹാം ഇളയശ്ശേരിൽ, ദേശീയ നിർവാഹക സമിതിയംഗം ജോ ഇലഞ്ഞിമൂട്ടിൽ, റീജണൽ യൂത്ത് വർക്ക് കമ്മിറ്റി ചെയർമാൻ ലിനോജ് ചാക്കോ, വർഗീസ് ടി. മങ്ങാട്, കുര്യൻ ചെറിയാൻ, ഫാ. ഷിബിൻ തോമസ് വർഗീസ്, സിസ്റ്റർ എമിലി, സിസ്റ്റർ ജൂലിയ എന്നിവർ പ്രസംഗിച്ചു.
