തിരുവല്ല: മന്നംകരച്ചിറയിൽ നിയന്ത്രണം വിട്ട കാർ തോട്ടിലേക്ക് മറിഞ്ഞുണ്ടായ അപകടത്തിൽ രണ്ട് പേർ അത്ഭുതകരമായി രക്ഷപ്പെട്ടു. കാവുംഭാഗം – മുത്തൂർ റോഡിൽ മന്നം കരച്ചിറ കല്ലേലി പാലത്തിന് താഴെ കൂടി ഒഴുകുന്ന തോട്ടിലേക്കാണ് കാർ മറിഞ്ഞത്. യാത്രക്കാരായ മുത്തൂർ പള്ളിപ്പറമ്പിൽ വീട്ടിൽ കല സുനിൽ ഇവരുടെ ബന്ധുവായ മുത്തൂർ പടിഞ്ഞാറ്റേൽ വീട്ടിൽ വൽസല എന്നിവരാണ് പരിക്കേൽക്കാതെ രക്ഷപ്പെട്ടത്.
ഇന്ന് രാവിലെ ഒമ്പത് മണിയോടെ ആയിരുന്നു സംഭവം. മന്നംകരച്ചിറയിൽ നിന്നും കാട്ടൂക്കര റോഡിലേക്ക് തിരിഞ്ഞ കാർ നിയന്ത്രണംവിട്ട് തോട്ടിലേക്ക് മറിയുകയായിരുന്നു. തോട്ടിൽ വെള്ളം കുറവായിരുന്നതിനാൽ വൻ അപകടം ഒഴിവായി. സംഭവമറിഞ്ഞ് തിരുവല്ല പോലീസും അഗ്നിശമനസേനയും സ്ഥലത്ത് എത്തി കാർ ക്രെയിൻ ഉപയോഗിച്ച് ഉയർത്തി പുറത്ത് എടുത്തു.
