തിരുവനന്തപുരം: തെരഞ്ഞെടുപ്പ് ഫലം വന്ന് ആറ് ദിവസം പിന്നിട്ടിട്ടും സര്ക്കാര് രൂപീകരിക്കാനായില്ലെങ്കിലും വകുപ്പുകളില് സ്ഥലംമാറ്റം ആരംഭിച്ചു. കരാര്, താത്കാലിക ജീവനക്കാരുടെ കണക്കെടുത്ത് യുഡിഎഫിന്റെ സര്വീസ് സംഘടനകള്. പോലീസില് ഉള്പ്പെടെ തങ്ങളെ ദ്രോഹിച്ച ഉദ്യോഗസ്ഥര്ക്ക് മറുപടി നല്കുമെന്ന യുഡിഎഫ് നേതാക്കളുടെ പ്രസ്താവനക്ക് പിന്നാലെയാണ് നടപടികള് ആരംഭിച്ചത്.
ഇടത് മന്ത്രിമാര് ഓഫീസ് ഒഴിഞ്ഞതോടെ വിവിധ വകുപ്പുകളില് നിന്ന് ഡെപ്യൂട്ടേഷനില് എത്തിയ ഉദ്യോഗസ്ഥര് തിരികെ മടങ്ങി. ഇത്തരക്കാരേയും യൂണിയന് നേതാക്കളെയും പ്രവര്ത്തകരെയും സ്ഥലം മാറ്റാനുള്ള നടപടികള് ആരംഭിച്ചു. ചില വകുപ്പുകളില് വകുപ്പ് സെക്രട്ടറിമാരെക്കൊണ്ടും പൊതുമേഖലാ സ്ഥാപനങ്ങളില് എംഡിമാരെക്കൊണ്ടും ഉത്തരവ് ഇറക്കിത്തുടങ്ങി.
വിവിധ വകുപ്പുകളിലെയും സ്ഥാപനങ്ങളിലെയും കരാര്, താത്കാലിക ജീവനക്കാരുടെ കക്ഷിരാഷ്ട്രീയം തിരിച്ചുള്ള കണക്കെടുപ്പ് യുഡിഎഫ് അനുകൂല സര്വീസ് സംഘടനകളുടെ നേതൃത്വത്തില് ആരംഭിച്ചു. എല്ഡിഎഫ് സര്ക്കാരിന്റെ കാലത്ത് നിയമനം നല്കിയവരുടെ കണക്കെടുപ്പും തുടങ്ങി. സര്ക്കാര് ചുമതലയേറ്റ് കഴിഞ്ഞാല് ഇവരെ പിരിച്ചുവിട്ട് യുഡിഎഫ് അനുകൂലികളെ നിയമിക്കാനാണ് നീക്കം.
