തിരുവനന്തപുരം: ശ്രീപത്മനാഭസ്വാമി ക്ഷേത്രത്തിലെ ആനി കളഭത്തോടനുബന്ധിച്ചുള്ള പ്രശസ്തമായ ആടി പെരുന്തിരമൃതു പൂജ 17ന് നടക്കും. ക്ഷേത്ര തന്ത്രിയുടെ മുഖ്യ കാർമ്മികത്വത്തിൽ നടക്കുന്ന പൂജയ്ക്ക് ശേഷം പ്രത്യേക കലശാഭിഷേകങ്ങളും, നെയ്യ് അഭിഷേകം, തേൻ അഭിഷേകം എന്നിവയും ഉണ്ടായിരിക്കുന്നതാണെന്ന് ക്ഷേത്ര എക്‌സിക്യൂട്ടീവ് ഓഫീസർ അറിയിച്ചു.
അഭിഷേകം ചെയ്യുന്ന തേനും നെയ്യും ഭക്തജനങ്ങൾക്ക് ക്ഷേത്രത്തിന്റെ നാല് നടകളിലുമുള്ള കൗണ്ടറുകൾ വഴി വാങ്ങാൻ സൗകര്യമൊരുക്കിയിട്ടുണ്ട്. രാവിലെ 8 മുതൽ 9 വരെയായിരിക്കും കലശാഭിഷേകം ദർശിക്കാൻ സൗകര്യമുള്ളത്.
അന്നേദിവസം ഭക്തജനങ്ങൾക്ക് ദർശന സമയത്തിലും ക്രമീകരണം ഏർപ്പെടുത്തിയിട്ടുണ്ട്.
രാവിലെ 6.30മുതൽ 7വരെയും. 9.30 മുതൽ 10.30 വരെയും വൈകിട്ട് 4.30 മുതൽ 6.15 വരെയും മാത്രമേ ദർശനം ഉണ്ടായിരിക്കുകയുളളൂ. വൈകിട്ട് തന്ത്രിയുടെ മുഖ്യകാർമികത്വത്തിൽ ശ്രീഭൂതബലിയും 8.30ന് ശ്രീബലി എഴുന്നളളിപ്പും നടക്കും. ശീവേലിക്ക് ശേഷം ദർശനം അനുവദിക്കില്ലെന്ന് ക്ഷേത്ര എക്‌സിക്യൂട്ടീവ് ഓഫീസർ അറിയിച്ചു.
