തിരുവല്ല: എം സി റോഡിലെ കുറ്റൂരിൽ റോഡ് അപകടങ്ങൾ തുടർക്കഥയാകുന്നു. ഉന്നത നിലവാരത്തിൽ നവീകരിച്ച ആറാട്ടുകടവ് വരട്ടാർ പാലം മുതൽ കുറ്റൂർ തോണ്ടറ പാലം വരെയുള്ള ഒരു കിലോമീറ്റർ ഭാഗത്താണ് അപകടങ്ങൾ നിത്യ സംഭവമായി മാറിയത്.
റോഡിൽ വാഹനങ്ങളുടെ അമിതവേഗത കൂടിയാകുമ്പോൾ ദിവസേന അപകടങ്ങൾ വർദ്ധിക്കുന്നു. കഴിഞ്ഞ ദിവസം രാവിലെ കുറ്റൂർ ഗവ. ഹയർസെക്കൻഡറി സ്കൂളിനു സമീപം തിരുവല്ല ഭാഗത്തേക്ക് പോയ കാർ വശം തിരിഞ്ഞപ്പോൾ അമിത വേഗതയിലെത്തിയ മറ്റൊരു കാർ ഇടിച്ചു കയറി അപകടമുണ്ടായി.
ചൊവ്വാഴ്ച ഉച്ചയ്ക്ക് 12 മണിക്ക് അമിത വേഗതയിൽ എത്തിയ പിക് അപ്പ് വാഹനം തോണ്ടറ പാലത്തിലെ നടപ്പാതയിലേക്ക് ഇടിച്ചു കയറി അപകടം ഉണ്ടായി. രണ്ട് അപകടങ്ങളിലും ആളപായം ഇല്ല. റോഡിൽ ഈ ഭാഗങ്ങളിലെ അപകടങ്ങൾ ഒഴിവാക്കുന്നതിന് പൊതു മരാമത്ത് വിഭാഗം സത്വര നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.
