പത്തനംതിട്ട: അന്തർ സംസ്ഥാന ലഹരിമരുന്ന് വിതരണ ശൃംഖലയിലെ പ്രധാനിയായ വിദേശ പൗരനെ പന്തളം പോലീസ് ഡൽഹിയിൽ നിന്ന് പിടികൂടി. നൈജീരിയൻ സ്വദേശിയായ സാമുവൽ ക്ലെഫ്സൺ ഒകാഫോർ എന്ന ആളാണ് പിടിയിലായത്. കാറിൻ്റെ ഡീസൽ ടാങ്കിൽ കടത്തിക്കൊണ്ട് വന്ന 395.296 ഗ്രാം, എം ഡി എം എ. പിടികുടിയ കേസിൻ്റെ തുടരന്വേഷണത്തിനൊടുവിലാണ് ഇയാളെ അറസ്റ്റ് ചെയ്തത്.
കഴിഞ്ഞ മാസം 15 നാണ് പന്തളം വലിയപാലത്തിന് സമീപം വച്ച് കാറിൻ്റെ ഡീസൽ ടാങ്കിൽ ഒളിച്ച് കടത്തിയ, 395. 296 ഗ്രാം എം ഡി എം എ, പന്തളം പോലീസും ജില്ലാ ഡാൻസാഫ് ടീമും ചേർന്ന് പിടികൂടിയത്. കേസിൽ ഒന്നാം പ്രതിയായ മുഹമ്മദ് ഷാ, രണ്ടാം പ്രതി ഷംനാദ് എന്നിവരെ സംഭവ സ്ഥലത്തു നിന്ന് പോലീസ് അറസ്റ്റ് ചെയ്തു.
ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തിൻ്റെ അടിസ്ഥാനത്തിലായിരുന്നു വാഹന പരിശോധന നടന്നത്. കസ്റ്റഡിയിലായ പ്രതികളെ ചോദ്യം ചെയ്തതിൽ നിന്നാണ് മയക്ക് മരുന്ന് വിതരണ ശൃഖലയുടെ പ്രധാനിയിലേക്ക് എത്തിച്ചേരാനായതെന്ന്. ജില്ലാ പോലീസ് മേധാവി ആർ ആനന്ദ് പറഞ്ഞു.
ജില്ലാ പോലീസ് മേധാവിയുടെ മേൽനോട്ടത്തിൽ, ഡി വൈ എസ് പി മാരായ കെ എസ് പ്രകാശ്, വി എസ് പ്രദീപ് കുമാർ, പന്തളം എസ് എച്ച് ഓ വി സജീഷ് കുമാർ, എസ് ഐ മാരായ മനീഷ് , യു വി വിഷ്ണു, എ എസ് ഐ ഷൈൻ, സി പി ഓ മാരായ അൻവർ ഷാ, രണ്ജിത്ത്, ശ്രീരാജ്, ജിതിൻ എന്നിവരടങ്ങിയ അന്വേഷണ സംഘമാണ് പ്രതിയെ പിടികൂടിയത്. നടപടിക്രമങ്ങൾ പൂർത്തിയാക്കി കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
