പത്തനംതിട്ട: പമ്പയിലെയും സന്നിധാനത്തെയും അജൈവ പാഴ് വസ്തു നീക്കാന്‍ ക്ലീന്‍ കേരള കമ്പനിയുടെ ശുചിത്വദൗത്യം ആരംഭിക്കുന്നു. സന്നിധാനത്ത് കെട്ടിക്കിടക്കുന്ന അജൈവ മാലിന്യം ദേവസ്വം ബോര്‍ഡിന്റെ അനുമതി പ്രകാരം ശാസ്ത്രീയമായി നീക്കം ചെയ്യുന്നതിനുള്ള നടപടികള്‍ക്ക് ആണ്തുടക്കമാകുന്നത്.
ക്ലീന്‍ കേരള കമ്പനിയുടെ നേതൃത്വത്തിലാണ് മാലിന്യശേഖരണവും തുടര്‍നടപടികളും. അജൈവ മാലിന്യ ശേഖരണത്തിന്റെ ഔദ്യോഗിക ഉദ്ഘാടനം സെപ്റ്റംബര്‍ ഏഴിന് മൂന്നിന് പമ്പയില്‍ തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് കെ. ജയകുമാര്‍ നിര്‍വഹിക്കും.
ശബരിമലയില്‍ വിവിധ ഇടങ്ങളില്‍ ശേഖരിച്ചിട്ടുള്ള അജൈവ മാലിന്യം ഘട്ടം ഘട്ടമായി നീക്കം ചെയ്ത് ശാസ്ത്രീയമായ രീതിയില്‍ കൈകാര്യം ചെയ്യുന്നതിനാണ് പദ്ധതി ലക്ഷ്യമിടുന്നത്. തീര്‍ഥാടന കേന്ദ്രത്തിന്റെ ശുചിത്വവും പരിസ്ഥിതി സംരക്ഷണവും ഉറപ്പാക്കുന്നതിന്റെ ഭാഗമായാണ് നടപടി. മാലിന്യം ഉറവിടത്തില്‍ തന്നെ തരംതിരിച്ച് ശേഖരിക്കുകയും പുനരുപയോഗിക്കാവുന്നവ പരമാവധി വീണ്ടെടുക്കുകയും ശേഷിക്കുന്നവ ശാസ്ത്രീയമായി സംസ്‌കരിക്കുകയും ചെയ്യുന്ന രീതിയിലാണ് പ്രവര്‍ത്തനം നടത്തുക.
