പത്തനംതിട്ട: വടശ്ശേരിക്കരയിലെ ജനവാസ മേഖലയിൽ നാല് കാട്ടാനകൾ ഇറങ്ങിയത് പ്രദേശത്ത് കടുത്ത ആശങ്കയ്ക്കും പ്രതിഷേധത്തിനും ഇടയാക്കി. വന്യമൃഗശല്യത്തിന് ശാശ്വത പരിഹാരം കാണണമെന്ന് ആവശ്യപ്പെട്ട് രംഗത്തെത്തിയ നാട്ടുകാർ സ്ഥലത്തെത്തിയ സ്ഥലം എം.എൽ.എ പഴകുളം മധുവുമായി രൂക്ഷമായ വാക്കേറ്റമുണ്ടായി.
ഇന്ന്പുലർച്ചെയോടെയാണ് നാല് കാട്ടാനകൾ ജനവാസ മേഖലയിലേക്ക് ഇറങ്ങിയത്. ആനകളെ കണ്ടതോടെ ഭയചകിതരായ നാട്ടുകാർ വിവരം വനംവകുപ്പ് അധികൃതരെയും ജനപ്രതിനിധികളെയും അറിയിക്കുകയായിരുന്നു. തുടർച്ചയായി പ്രദേശത്ത് കാട്ടാനകൾ ഇറങ്ങുന്നതും കൃഷി നശിപ്പിക്കുന്നതും ജനങ്ങളുടെ ജീവന് ഭീഷണിയാകുന്നതും ചൂണ്ടിക്കാട്ടിയാണ് നാട്ടുകാർ പ്രതിഷേധിച്ചത്.
സംഭവമറിഞ്ഞ് സ്ഥലത്തെത്തിയ പഴകുളം മധു എം.എൽ.എയോട് നാട്ടുകാർ തങ്ങളുടെ പ്രതിഷേധം രേഖപ്പെടുത്തി. സുരക്ഷാ നടപടികൾ സ്വീകരിക്കുന്നതിൽ അധികൃതർ വീഴ്ച വരുത്തുന്നുവെന്ന് ആരോപിച്ച നാട്ടുകാരും എം.എൽ.എയും തമ്മിൽ ഇതോടെ വാക്കേറ്റമുണ്ടാവുകയായിരുന്നു. വനംവകുപ്പ് ഉദ്യോഗസ്ഥരും പോലീസും സ്ഥലത്തെത്തി സ്ഥിതിഗതികൾ ശാന്തമാക്കി. തുടർന്ന് ആനകളെ കാട്ടിലേക്ക് തുരത്താനുമുള്ള നടപടികൾ ആരംഭിച്ചു. കാട്ടാനകൾ നാട്ടിലിറങ്ങുന്നതിന് തടയിടാൻ വനം വകുപ്പുമായി ചേർന്ന് കർമ പദ്ധതി തയ്യാറാക്കുമെന്ന് പഴകുളം മധു എം എൽ എ പറഞ്ഞു





