തിരുവല്ല : ജലവിതരണ പൈപ്പ് ലൈൻ പൊട്ടി കുടിവെള്ളം പാഴാകാൻ തുടങ്ങിയിട്ട് നാളേറെയായിട്ടും നടപടിയില്ലെന്ന് ആക്ഷേപം.കുറ്റൂർ- തെങ്ങേലി റോഡിൽ തെങ്ങേലി തറേപ്പറമ്പിൽ പടിയിലാണ് ജലജീവൻ മിഷൻ്റെ പൈപ്പ് തകർന്ന് കുടിവെള്ളം പാഴാകുന്നത്. ഒരു മാസമായിട്ടും പൈപ്പ് ലൈൻ നന്നാക്കുന്നില്ലെന്നാണ് നാട്ടുകാരുടെ പരാതി.
പൈപ്പ് ലൈൻ റോഡിൻ്റെ ഒരു വശത്ത് കൂടിയാണ് കടന്നു പോകുന്നത്. മറുവശത്തെ കുടുംബങ്ങൾക്ക് റോഡിന് കുറുകെയാണ് കണക്ഷൻ നൽകിയിരിക്കുന്നത്. പൈപ്പ് സ്ഥാപിക്കാൻ എടുത്ത കുഴികൾക്ക് താഴ്ച ഇല്ലാത്തതിനാൽ ഭാര വാഹനങ്ങൾ കയറുമ്പോൾ പൈപ്പ് പൊട്ടുന്നതു ഇവിടെ നിത്യ സംഭവമായി.
തകരാറിലാവുന്ന പൈപ്പുകൾ വീട്ടുടമസ്ഥർ തന്നെ നന്നാക്കണമെന്നാണ് ജല അതോറിറ്റി അധികൃതർ പറയുന്നതെന്നാണ് ഉപയോക്താക്കളുടെ പരാതി. എന്നാൽ നിലവാരം കുറഞ്ഞ പൈപ്പുകൾ ഇടുന്നതിനാലാണ് അവ നിരന്തരം പൊട്ടുന്നതെന്നും നാട്ടുകാർ പറയുന്നു
