കോന്നി: കുടുംബശ്രീയുടെ നേതൃത്വത്തിൽ സംസ്ഥാനത്ത് ആദ്യമായി വാർഡ് തലത്തിൽ പാലിയേറ്റിവ് കെയർ പദ്ധതിക്ക് തുടക്കമായി. പ്രമാടം പഞ്ചായത്ത് 5-ാം വാർഡിൽ ആണ് കിടപ്പ് രോഗികൾക്ക് ആശ്വാസമായി പദ്ധതി ആരംഭിച്ചത്. ഇളകൊള്ളൂർ സെൻ്റ് ജോർജ് ഹൈസ്കൂൾ ഹാളിൽ ജില്ലാ കലക്ടർ എസ്. പ്രേം കൃഷ്ണൻ ഉദ്ഘാടനം ചെയ്തു. ശയ്യാവലംബരായവരെ പരിചരിക്കുന്നവർ അനുകമ്പയോടെ പെരുമാറണമെന്നും ആവശ്യമായ പരിശീലനം നേടിയിരിക്കണമെന്നും അദ്ദേഹം പറഞ്ഞു
പഞ്ചായത്തംഗം എം.കെ.മനോജ് അധ്യക്ഷനായി. പഞ്ചായത്ത് പ്രസിഡൻ്റ് എൻ. നവനീത് വോളൻ്റിയർമാർക്കുള്ള തിരിച്ചറിയൽ കാർഡുകൾ വിതരണം ചെയ്തു. കിടപ്പ് രോഗികൾക്ക് ആവശ്യമായ ഉപകരണങ്ങൾ, വീടുകളിൽ എത്തിയുള്ള പരിചരണം, നിർധന രോഗികൾക്ക് സൗജന്യ ആംബുലൻസ് സർവീസ്, അടിയന്തര ചികിത്സാ സഹായം എന്നിവയാണ് പദ്ധതിയിലൂടെ ലഭിക്കുന്ന സേവനങ്ങൾ
