കോട്ടയം : കോട്ടയത്ത് പ്രവർത്തിക്കുന്ന ഇന്ത്യൻ കോഫി ഹൗസും അടച്ച് പൂട്ടലിലേക്ക് നീങ്ങുന്നു. ജീവനക്കാരുടെ കുറവും,കച്ചവടം കുറഞ്ഞതുമാണ് അടച്ചുപൂട്ടാൻ കാരണമായതെന്ന് അധികൃതർ വ്യക്തമാക്കുന്നത്.കെട്ടിട വാടക നൽകി കഴിഞ്ഞാൽ ലാഭമില്ലാത്ത സ്ഥിതിയായി.
മേയ് 30ന് പ്രവർത്തനം അവസാനിപ്പിക്കാൻ ഇന്ത്യാ കോഫി ബോർഡ് വർക്കേഴ്‌സ് കോ-ഓപ്പറേറ്റീവ് സൊസൈറ്റി ബ്രാഞ്ച് മേൽ അധികാരികൾക്ക് നിർദേശം നൽകി.2009 ഫെബ്രുവരി 15നാണ് നഗരമധ്യത്തിൽ മുനിസിപ്പാലിറ്റി ഓഫീസ് കെട്ടിടത്തിനു സമീപമുള്ള വൈഎംസിഎ കെട്ടിടത്തിൽ ഈ കോഫി ഹൗസ് പ്രവർത്തനമാരംഭിച്ചത്.
ആരംഭകാലത്ത് നല്ല രീതിയിൽ പ്രവർത്തിക്കുകയും ഒരു ലക്ഷത്തിനു മുകളിൽ കച്ചവടം ലഭിക്കുകയും ചെയ്തിരുന്ന ബ്രാഞ്ചുകളിലൊന്നായിരുന്നു കോട്ടയത്തേത്. എന്നാൽ പിന്നീട് ഇത് നഷ്ടത്തിലാവുകയായിരുന്നു. വൈകുന്നേരങ്ങളിലും രാത്രികാലങ്ങളിലും കക്ഷി രാഷ്ട്രീയം മറന്ന് എല്ലാവരും ഒത്തുചേരാനും സംസാരിക്കാനുമായി എത്തിയിരുന്നതും ഇവിടെയായിരുന്നു.
